Satellite Dish & Wireless Antenna, Qikiqtarjuaq, Nunavut

NBDC-ᑯᑦ ᐊᑦᔨᐅᖏᑦᑐᖅ ᐱᓕᕆᓂᖓᑦ

ᓄᓇᕗᑦᒥ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒥᒃ ᐱᕙᓪᓕᐊᔪᓕᕆᔨᒃᑯᑦ ᑎᒥᖓᑦ (NBDC) ᑐᕌᖅᑕᕆᓇᓱᐊᖅᑕᖓ ᐃᓘᓇᑦᑎᐊᑎᒃ ᓄᓇᕗᑦᒥ ᓄᓇᖃᑦᑎᐅᔪᑦ ᐊᑐᕈᓐᓇᖁᓪᓗᒋᑦ ᐊᑭᑐᓗᐊᖏᑦᑐᒥᒃ ᓱᒃᑲᔪᒃᑯᑦ ᖃᕋᓴᐅᔭᓕᕆᔾᔪᑎᒥᒃ ᐱᑕᖃᑦᑎᑕᐅᔪᖅ ᓇᒻᒥᓂᖃᑦᑎᐅᔪᒧᑦ. ᑮᓇᐅᔭᓕᐅᕋᓱᐊᖅᑎᐅᖏᑦᑐᑎᒃ ᑎᒥᐅᔪᑦ, NBDC-ᑯᑦ ᐱᒋᐊᖅᑎᑦᑎᓯᒪᔪᑦ ᐱᕙᓪᓕᐊᓂᖓᓂᒃ ᓯᕗᕙᓯᓐᓂᖅᐸᖑᖃᑕᐅᔪᒥᒃ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒥᒃ ᓄᓇᕐᔪᐊᕐᒥ.

ᑮᓇᐅᔭᓕᐅᕋᓱᐊᖅᑎᐅᖏᑦᑐᑎᒃ ᑎᒥᐅᔪᑦ ᐋᖅᑭᒃᑕᐅᓯᒪᔪᑦ ᐱᔨᑎᕐᓂᐊᕐᓗᑎᒃ ᓄᓇᕗᑦᒥ ᓄᓇᖃᑦᑎᐅᔪᓂᒃ, NBDC-ᑯᑦ ᐊᔪᓐᖏᑦᑐᑦ ᑮᓇᐅᔭᖅᑖᕈᓐᓇᕐᓗᑎᒃ ᑲᓇᑕᐅᑉ ᒐᕙᒪᖓᓂᑦ ᓄᓇᕗᑦ ᐃᓄᖏᓐᓄᑦ ᐊᑑᑎᖃᕐᓂᐊᖅᑐᓂᒃ ᐱᓕᕆᐊᒃᓴᑎᒍᑦ ᑲᒪᒋᔭᐅᔪᑦ ᑲᓇᑕᒥ ᐱᖁᑎᕐᔪᐊᓕᕆᔨᒃᑯᖏᓐᓄᑦ.

2009 - ᐱᑕᖃᕆᐊᖃᕐᓂᖅ ᐅᓄᕐᓂᖅᓴᓂᒃ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒥᒃ ᓄᓇᕗᑦᒥ

ᐅᓪᓗᒥ, ᐃᓘᓇᑎᐸᓗᒃ ᓇᒻᒥᓂᖃᑦᑐᑦ, ᑲᑐᔾᔨᖃᑎᒋᑦ ᐊᒻᒪᓗ ᐅᖓᑖᓄᑦ ᐊᕐᕙᖓᑕ ᓄᓇᖃᑦᑎᐅᔪᓕᒫᑦ ᐊᑐᖃᑦᑕᖅᑐᑦ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒥᒃ. ᑮᓇᐅᔭᒃᑯᕖᑦ, ᓂᐅᕕᖅᕖᑦ, ᒥᑭᑦᑑᑎᑦ ᓇᒻᒥᓂᕆᔭᐅᔪᑦ, ᒐᕙᒪᒃᑯᑦ ᐊᒻᒪᓗ ᑭᒃᑯᑐᐃᓐᓇᐃᑦ ᑐᕚᖃᓕᖅᓯᒪᕗᑦ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒥᒃ ᖃᐅᑕᒫᑦ, ᐊᒻᒪᓗ ᐅᖓᑖᓅᓗᐊᓕᖅᐸᑦᑐᑎᒃ ᑭᓪᓕᒋᔭᖏᑕ ᐱᓕᕆᔾᔪᑎᐅᔪᑦ. ᑕᒪᓐᓇᓗ ᑐᓴᕈᒥᓇᖅᐳᖅ - ᓄᓇᕗᑦᒥᐅᑦ ᑲᔪᓯᕙᓪᓕᐊᕗᑦ ᖃᐅᔨᒪᓂᕆᔭᐅᔪᓄᑦ ᓄᓇᕐᔪᐊᕐᒥ ᓱᒃᑲᔪᒥᓪᓗ ᑕᒪᓐᓇ ᐱᕙᓪᓕᐊᓪᓗᓂ. ᑭᓯᐊᓂᓕ, ᐅᓪᓗᒥᐅᔪᖅ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᓕᕆᔾᔪᑎᐅᔪᑦ ᐊᓯᒃᑲᓐᓂᖏᓐᓂᒃ ᑮᓇᐅᔭᖃᕆᐊᖃᒻᒪᑕ ᐊᓐᖑᑎᓯᒪᓂᐊᕐᓗᓂ ᐊᑐᖅᑕᐅᔪᒪᕙᓪᓕᐊᑐᐃᓐᓇᕐᓂᕆᔭᖓᓂᒃ ᑖᒃᓱᒪ ᐱᓪᓗᐊᑕᐅᔫᑉ ᐱᔨᑦᑎᕈᑎᐅᑉ ᐃᑲᔫᑎᖃᑦᑐᖅ ᐃᓕᖅᑯᓯᐅᑉ, ᐃᓄᐃᑦ ᐊᒻᒪᓗ ᑮᓇᐅᔭᓕᐅᕋᓱᐊᕐᓂᐅᑉ ᖃᓄᐃᖏᑎᐊᕐᓂᖓᓄᑦ ᓄᓇᕗᓕᒫᒥ. NBDC-ᑯᑦ ᑲᒪᒋᔭᖃᑦᑐᑦ ᑖᒃᓱᒥᖓ ᑖᒃᑯᑎᒎᓇ ᐊᕐᕌᒍᓄᑦ ᑕᓪᓕᒪᓄᑦ ᐱᓕᕆᓂᕐᒧᑦ ᐸᕐᓇᐅᑎᖓᑎᒍᑦ “ᑲᒪᒋᔭᖃᕐᓂᖅ ᖃᖓᑦᑕᖅᑎᑕᐅᓯᒪᔪᒃᑯᑦ ᓴᓐᖏᓂᖓᓂᒃ - ᓄᓇᕗᑦ ᐊᖅᑯᑎᒋᓂᐊᖅᑕᖓ ᓯᕗᒧᑦ”. ᔮᓄᐊᓕᒥ 2009, ᑲᓇᑕᒥ ᐱᖁᑎᕐᔪᐊᓕᕆᔨᒃᑯᑦ ᐊᒻᒪᓗ NBDC-ᑯᑦ ᐊᑎᓕᐅᓚᐅᖅᑐᑦ ᐊᕐᕌᒍᓄᑦ ᑕᓪᓕᒪᓄᑦ ᑐᓂᕐᕈᑎᓄᑦ ᐊᖏᖃᑎᒌᒍᑎᒥᒃ, ᑲᑎᑕᐅᓪᓗᓂ ᑕᐃᒪᓐᓇᓪᓗᐊᖅ ᑮᓇᐅᔭᖅᑖᕆᔭᐅᔪᓂᒃ ᑲᓇᑕᐅᑉ ᒐᕙᒪᖓᓂᑦ ᐊᒻᒪᓗ ᓇᒻᒥᖃᑦᑎᐅᔪᓂᒃ, ᐃᒪᓐᓇᐅᕗᖅ ᑮᓇᐅᔭᖅᑖᖑᔪᑦ $43,202,000. ᑖᓐᓇ NBDC-ᑯᑦ ᑐᒡᓕᐊᓂ ᐱᓕᕆᖃᑎᖃᒻᒪᕆᓐᓂᕆᔭᖓ ᑲᓇᑕᒥ ᐱᖁᑎᕐᔪᐊᓕᕆᔨᒃᑯᓐᓂᑦ, ᑕᐃᔭᐅᔪᖅ ᐃᒫᒃ ᐱᖁᑎᕐᔪᐊᓂᒃ ᐱᓕᕆᓂᖅ II.

ᐱᖁᑎᕐᔪᐊᓂᒃ ᐱᓕᕆᓂᖅ II

ᑖᓐᓇ ᐱᖁᑎᕐᔪᐊᓂᑦ ᐱᓕᕆᓂᖅ II ᐱᓕᕆᐊᒃᓴᐅᑲᐃᓐᓇᖅᑐᖅ ᓴᓇᔭᐅᓯᒪᔪᖅ ᐱᐅᓪᓚᕆᑦᑐᒥᒃ ᐱᔨᑦᑎᖅᑕᐅᔪᓐᓇᖁᓪᓗᒋᑦ ᐊᑐᖃᑦᑕᖅᑐᑦ. ᐱᕙᓪᓕᐊᑎᑕᐅᑎᓪᓗᒍ ᐸᕐᓇᐅᑦ, NBDC-ᑯᑦ ᐱᓕᕆᓇᓱᐊᓂᐊᖅᑐᑦ:

1. ᓇᓗᓇᐃᖅᑕᐅᓗᓂ ᖃᓄᖅ ᐃᓄᐃᑦ ᐃᑲᔪᖅᑕᐅᓂᐊᕐᒪᖔᑕ ᓇᓗᓇᐃᖅᑕᐅᓯᒪᔪᓄᑦ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᓕᕆᐊᒃᓴᐅᑲᐃᓐᓇᖅᑐᓂᒃ;
2. ᑕᑯᒃᓴᐅᑎᑕᐅᓗᓂ ᖃᓄᖅ ᑮᓇᐅᔭᑦ ᑎᑭᐅᑎᓂᐊᕐᒪᖔᑕ ᐊᑐᖅᐸᑦᑐᓄᑦ ᐋᖅᑭᐹᓪᓕᖅᓯᒪᔪᑦ ᐱᔨᑦᑎᕈᑎᑎᒍᑦ ᑎᑎᕋᖅᑕᐅᓯᒪᔪᓂᒃ ᐅᓂᒃᑳᑦᑐᖃᑦᑎᓪᓗᒍ;
3. ᐱᓕᕆᐊᒃᓴᐅᑲᐃᓐᓇᖅᑐᓕᒫᑦ ᓴᖅᑭᑕᐅᖃᑦᑕᕐᓗᑎᒃ ᑕᒪᒃᑯᐊ ᐱᔨᑦᑎᕈᑏᑦ ᐱᓕᕆᐊᖑᒍᓐᓇᖃᑦᑕᓂᐊᕐᒪᑕ ᓇᒻᒥᓂᖃᑦᑎᐅᔪᓄᑦ ᐊᑦᔨᒌᑎᑦᑎᓂᒃᑯᑦ, ᒪᑐᐃᖓᔪᒃᑯᑦ, ᐊᑭᑦᑐᕋᐅᑎᓂᒃᑯᑦ;
4. ᓇᓗᓇᐃᕐᓗᒍ ᖃᓄᖅ ᑐᓂᕐᕈᑏᑦ ᐱᓕᕆᐊᕐᒃᓴᐅᑲᐃᓐᓇᖅᑐᒧᑦ ᓵᓚᖃᑦᑐᑦ ᐃᑲᔪᕐᓂᖃᕐᓂᐊᕐᒪᖔᑕ ᐱᕚᓪᓕᖅᓯᒪᔪᒧᑦ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᓕᕆᐊᒃᓴᐅᑲᐃᓐᓇᖅᑐᓄᑦ;
5. ᓴᖅᑮᓗᓂ ᓵᑕᔅᓴᐅᔪᓐᓇᖅᑐᒥᒃ, ᐋᖅᑭᐅᒪᑎᐊᖅᑐᒥᒃ ᐱᓕᕆᓂᐅᔪᒥᒃ ᑕᒪᒃᑯᐊ ᑮᓇᐅᔭᐃᑦ ᐃᖏᕐᕋᔪᓐᓇᓂᐊᕐᒪᑕ ᐃᓗᐊᓄᑦ ᓄᓇᕗᑦ ᑕᒪᒃᑯᓄᖓ ᐱᕚᓪᓕᖅᓯᒪᔪᑦ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕈᑎᐅᔪᑦ ᑭᒃᑯᑐᐃᓐᓇᕐᓄᑦ ᐊᑑᑎᖃᕐᓂᐊᖅᑐᑦ.

ᐱᖁᑎᕐᔪᐊᓂᒃ ᐱᓕᕆᓂᕐᒧᑦ II ᑐᕌᖅᑕᐅᓇᓱᐊᖅᑐᑦ:

NBDC-ᑯᑦ ᐱᓕᕆᖃᑎᖃᖅᓯᒪᔪᑦ ᐱᓕᕆᐊᒃᓴᐅᑲᐃᓐᓇᖅᑐᒧᑦ ᓵᓚᖃᖅᓯᒪᔪᓂᒃ ᓄᓇᕗᒻᒥ ᓇᓗᓇᐃᖅᑎᕆᓪᓗᑎᒃ ᐃᓄᐃᑦ ᐱᔪᒫᕆᔭᖏᓐᓂᒃ, ᑎᒥᐅᔪᑦ ᐊᒻᒪᓗ ᓇᒻᒥᓂᖃᑦᑎᐅᔪᑦ ᐸᕐᓇᐅᑎᓖᑦ ᐊᑐᖅᑕᐅᓂᖅᓴᐅᓕᖅᑎᑦᑎᔪᒪᓪᓗᑎᒃ ᓱᒃᑲᔪᒃᑯᑦ ᖃᕋᓴᐅᔭᓕᕆᔾᔪᑎᓂᒃ ᐊᕐᕌᒍᑦ ᑕᓪᓕᒪᐅᓂᐊᖅᑐᓂ (ᑕᑯᓗᒍ ᓯᕗᓕᖅᑏᑦ ᐅᖃᐅᓯᖏᑦ).

ᖁᔭᓐᓇᒦᖅᐸᕗᑦ 20 ᐃᓄᐃᑦ ᑕᑕᑎᕆᓚᐅᖅᑐᑦ ᖃᐅᔨᓴᕐᓂᖃᑦᑎᓪᓗᑕ ᐅᓪᓗᒥᐅᔪᖅ ᐊᒻᒪᓗ ᓯᕗᓂᒃᓴᒥ ᐊᑐᖅᑕᐅᓂᖓᓄᑦ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒥᒃ ᓄᓇᕗᑦᒥ. ᖁᔭᓐᓇᒦᕐᒥᔪᒍᑦᑕᐅᖅ ᑕᐃᒃᑯᓂᖓ 50-ᐅᔪᓂᒃ ᐃᓄᓐᓂᒃ ᖃᐃᓚᐅᖅᑐᓂᒃ ᐃᓕᓐᓂᐊᕐᓂᖃᑦᑎᓪᓗᑕ ᐃᖃᓗᒃᑑᑦᑎᐊᕐᒥ, ᑲᖏᖅᖠᓂᕐᒥ, ᐊᒻᒪᓗ ᐃᖃᓗᓐᓂ ᕖᕗᐊᓕᐅᑎᓪᓗᒍ 2008. ᐅᖃᐅᓯᕆᓚᐅᖅᑕᖏᑦ ᑐᑭᒧᐊᑦᑎᑦᑎᓚᐅᕐᒪᑕ ᐱᕙᓪᓕᐊᓂᕆᔭᖓᓂᒃ ᓄᑖᑦ ᐱᔨᑦᑎᕈᑏᑦ ᐱᑕᖃᕆᐊᓖᑦ ᓄᓇᕗᑦ ᓯᕗᓂᒃᓴᖓᓄᑦ.

NBDC-ᑯᑦ ᐱᓕᕆᖃᑎᖃᑉᐳᑦ ᒐᕙᒪᐅᑉ ᐃᓗᐊᓂ ᐊᑦᔨᒌᖏᑦᑐᓂᒃ ᐋᖅᑭᒃᓱᐃᓇᓱᐊᖅᑐᑎᒃ ᐋᖅᑭᑎᐊᖅᓯᒪᓛᖑᔪᒥᒃ ᑲᔪᓯᓂᐅᔪᓐᓇᖅᑐᓂᒃ ᐊᖑᒻᒪᑎᒋᐊᖅᑐᑎᒃ ᑮᓇᐅᔭᐃᑦ ᐊᑐᖅᑕᐅᔭᕆᐊᖃᓐᓂᖏᓐᓂᒃ ᑕᒪᒃᑯᐊ ᐱᔨᑦᑎᖅᑕᐅᔪᑦ ᐱᔭᕆᐊᖃᕐᓂᖏᓐᓂᒃ ᐃᓱᒪᒋᔭᐅᓪᓗᑎᒃ. NBDC-ᑯᑦ ᐋᖅᑭᒃᓯᒪᓂᖓᑦ ᐋᖅᑭᒃᓯᒪᓂᐊᖅᐳᖅ ᑕᒪᒃᑯᐊ ᑮᓇᐅᔭᐃᑦ ᐊᑐᖅᑕᐅᔪᑦ ᖃᖓᑦᑕᖅᑎᑕᐅᓯᒪᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐊᒃᑐᐃᓂᖃᕈᓐᓇᖁᓪᓗᒋᑦ ᓇᒻᒥᓂᖅ ᑮᓇᐅᔭᓕᐅᕋᓱᐊᖅᑎᐅᔪᓂᒃ ᑭᓇᑐᐃᓐᓇᕐᒧᑦ ᒪᑐᐃᖓᓗᓂ ᐊᒻᒪᓗ ᐊᑲᐅᓈᖅᓯᒪᔪᒃᑯᑦ ᐊᑭᑦᑐᕋᐅᑎᑦᑎᑦᓂᕐᒥᒃ ᓴᖅᑭᔮᖅᑎᑦᑎᓗᑎᒃ. ᑎᑭᑕᐅᓇᓱᐊᖅᐳᖅ ᑖᒃᑯᓇᓐᖓᑦ NBDC-ᑯᓐᓂᑦ ᑖᒃᑯᐊ ᐊᑐᖅᑕᐅᔪᑦ ᐊᑲᐅᓛᒥᒃ ᐱᔨᑦᑎᖅᑕᐅᖁᓪᓗᒋᑦ ᑭᒃᑯᑐᐃᓐᓇᐃᑦ ᑮᓇᐅᔭᐃᑦ ᐊᑐᖅᑕᐅᓂᖏᑎᒍᑦ, ᑕᒪᒃᑯᐊ ᐊᑐᖅᑎᐅᔪᑦ ᓄᓇᕗᒻᒥ ᐱᓕᕆᔪᓐᓇᖁᓪᓗᒋᑦ ᑕᑯᔪᒪᔭᒥᓐᓂᒃ ᒪᑯᑎᒎᓇ ᐃᓅᓯᓕᕆᓂᕐᒧᑦ, ᐃᓕᖅᑯᓯᓕᕆᓂᕐᒧᑦ, ᑮᓇᐅᔭᓕᐅᕋᓱᐊᕐᓂᕐᒧᑦ, ᐃᓕᓐᓂᐊᖅᑐᓕᕆᓂᕐᒧᑦ ᐊᒻᒪᓗ ᐃᓅᓯᖃᕋᓱᐊᕐᓂᕐᒥᒃ ᐱᐅᓛᒥᒃ ᑎᑭᓐᓇᓱᐊᖅᑕᖏᓐᓄᑦ.

ᐊᕐᕌᒍᑦ ᑕᓪᓕᒪᓄᑦ ᐱᓕᕆᓂᕐᒧᑦ ᐸᕐᓇᐅᑎ (2008-2013) – “ᑲᒪᒋᔭᖃᕐᓂᖅ ᖃᖓᑦᑕᖅᑎᑕᐅᓯᒪᔪᒃᑯᑦ ᓴᓐᖏᓂᕐᒥᒃ - ᓄᓇᕗᑦ ᐊᖅᑯᑎᖓ ᓯᕗᒧᑦ”

ᖃᕋᓴᐅᔭᒨᕐᓗᒍ ᐊᐅᓚᑦᑎᔩᑦ ᐅᓂᒃᑳᖓ NBDC-ᑯᑦ ᐸᕐᓇᐅᑎᖓ, “ᑲᒪᒋᔭᖃᕐᓂᖅ ᖃᖓᑦᑕᖅᑎᑕᐅᓯᒪᔪᒃᑯᑦ ᓴᓐᖏᓂᕐᒥᒃ - ᓄᓇᕗᑦ ᐊᖅᑯᑎᖓ ᓯᕗᒧᑦ”

ᐅᓂᒃᑳᖑᓂᖓ ᓱᒻᒪᑦ ᓄᓇᕗᑦ ᐱᒋᐊᖃᒻᒪᖔᑦ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒥᒃ, ᐊᒻᒪᓗ ᐃᓚᖏᑦ ᐊᑐᓕᖁᔨᔾᔪᑎᑦ ᓄᓇᕗᒻᒥᐅᓃᓐᖔᖅᓯᒪᔪᑦ ᐊᑖᓃᖃᓯᐅᑎᕗᑦ, ᐱᔭᐅᓯᒪᔪᑦ ᐊᐅᓚᑦᑎᔩᑦ ᐅᓂᒃᑳᖓᓂᑦ NBDC-ᑯᑦ ᐱᓕᕆᓂᕐᒧᑦ ᐸᕐᓇᐅᑎᖓᓂᒃ.

ᐊᖏᔪᐊᓗᒃ ᓄᓇ - ᖃᑦᑏᓐᓇᑯᓗᐃᑦ ᐃᓄᖏᑦ

ᓄᓇᕗᑦ ᑲᓇᑕᐅᑉ ᓄᑖᖑᓂᖅᐹᕆᕚ , ᕿᑎᐊᓃᑦᑐᖅ ᐊᒻᒪᓗ ᑲᓇᓐᓇᖅᐸᓯᐊᓃᑦᑐᖅ ᑲᓇᑕᐅᑉ ᐅᑭᐅᖅᑕᖅᑐᐊᓂ. 2 ᒥᓕᐊᓐ ᑭᑉᐹᕆᑦᑐᖅ ᑭᓗᒦᑕᐸᓗᒃᑯᑦ, ᓄᓇᕗᑦ ᐊᖏᓂᖅᐹᖑᕗᖅ ᓄᓇᓕᐅᔪᖅ, ᐱᖃᓯᐅᔾᔨᔪᖅ 20-ᐳᓴᓐᑎᒃᑯᑦ ᑲᓇᑕᐅᑉ ᓄᓇᖓᓂᒃ, ᐊᒥᓲᓂᖃᑦᑐᑎᒃ .0133 ᐃᓄᓐᓂᒃ ᐊᑕᐅᓯᖅ ᕿᓗᒦᑕ.

ᑖᒃᑯᐊ 27,000 ᐃᓄᐃᑦ ᓄᓇᕗᑦᒥ ᓄᓇᖃᑦᑐᑦ 25-ᖑᔪᓂ ᐅᖓᓯᑦᑑᑎᓂ ᓄᓇᓕᓐᓂ - ᐊᑐᕆᐊᖃᖏᑦᑐᑦ ᓄᓇᓕᓐᓅᖓᔪᓂᒃ. 85-ᐳᓴᓐᑎᖓ ᐅᓄᕐᓂᖏᑕ ᐃᓄᐃᑦ ᐃᓅᔪᑦ. ᓄᓇᕗᑦ ᐊᖏᓂᖃᑦᑐᖅ ᐃᓘᓇᖓᓄᐸᓗᒃ ᑐᑭᒧᑦ ᑲᓇᑕᒥ ᑲᓇᓐᓇᕐᒥᑦ ᐱᖓᓐᓇᕐᒧᑦ, ᐊᒻᒪᓗ ᐅᐊᓐᓇᕐᒥᑦ ᓂᒋᐊᓄᑦ, ᐊᖏᔪᖅᔪᐊᕐᕌᓗᒃ. ᐆᑦᑑᑎᒋᓗᒍ, ᐅᖓᓯᓐᓂᖓ ᐅᑭᐅᖅᑕᖅᑐᒦᓐᓂᖅᐸᖑᔪᖅ ᓄᓇᓕᖓ ᐊᐅᓱᐃᑦᑐᖅ ᑕᐅᓄᖓ ᓂᒋᖅᐸᓯᒻᒥᓂᖅᐹᖑᔪᒧᑦ ᓄᓇᓕᖓᓄᑦ ᓴᓂᑭᓗᐊᖅ ᑕᐃᒪᓐᓇᓪᓗᐊᖑᕗᖅ.

ᑕᐃᒪᓐᓇᓪᓗᐊᖑᕗᖅ

ᐅᓄᕐᓂᖅᓴᐃᑦ ᐊᐅᓚᖃᑦᑕᖅᑐᑦ ᓄᓇᓕᓐᓄᑦ ᖃᖓᑕᖃᑦᑕᖅᐳᑦ ᐊᑭᑐᔪᒻᒪᕆᐊᓗᒃᑯᑦ, ᖃᖓᑕᓲᖃᖃᑦᑕᖅᑐᑎᒃ ᐅᖓᑕᐅᔾᔨᔪᓂᒃ ᐊᑭᖓᓂᒃ ᖃᖓᑕᓂᕐᒧᑦ ᑐᕌᓐᑐᒧᑦ ᑕᐃᑯᖓ Frankfurt. ᓯᓚᒧᑦ ᑭᖑᕙᕆᐊᖅᑕᐅᓃᑦ ᐊᒻᒪᓗ ᐅᖓᓯᓐᓂᖓ ᓄᓇᓖᑦ ᐅᓪᓗᓂᒃ ᐊᒥᓱᓂᒃ ᐊᐅᓚᖅᓯᒪᔭᕆᐊᖃᑉᐸᑉᐳᑦ ᑲᑎᒪᔭᖅᑐᕐᓗᑎᒃ.

ᓄᓇᑦᑕ ᐊᖏᓗᐊᕐᓂᐊᓗᐊᓄᑦ, ᑐᓴᐅᒪᖃᑎᒌᖃᑦᑕᖅᑐᒍᑦ ᐅᖓᓯᒃᑐᒃᑯᑦ ᖃᐅᑕᒫᑦ - ᐊᑐᖅᑐᑕ ᑐᓴᐅᒪᖃᑎᒌᒍᑎᒥᒃ ᖃᓄᐃᑦᑐᑐᐃᓐᓇᕐᓂᒃ ᐊᑐᐃᓐᓇᐅᔪᓂᒃ. ᑐᓴᐅᒪᖃᑦᑕᐅᑎᓂᕐᒧᑦ ᑮᓇᐅᔭᖅᑐᕈᑏᑦ ᐃᓗᐊᓃᑉᐳᑦ ᐃᓘᓇᖏᓐᓂᒃ ᐱᓕᕆᓂᕆᔭᑦᑎᒍᑦ. ᓄᓇᕗᑦ ᐃᑲᔪᖅᑕᐅᓂᖅᓴᒻᒪᕆᐅᒐᔭᖅᐳᑦ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᑯᑦ ᐊᓯᖏᓐᓂᒃ ᓄᓇᓕᐅᔪᓂᒃ ᑲᓇᑕᒥ.

ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐊᒃᑐᐊᓂᖃᑦᑎᑦᑎᓂᖅ ᑖᒃᑯᓂᖓ ᓄᓇᓕᓐᓂᒃ ᐊᒻᒪᓗ ᖃᓪᓗᓈᓃᑦᑐᓂᒃ ᐱᓪᓗᐊᑕᒻᒪᕆᒃᑯᑦ ᐱᓕᕆᓂᖃᕐᓂᐊᖅᐳᖅ ᑐᓴᐅᒪᖃᑦᑕᐅᑎᓂᑐᐃᓐᓇᐅᖏᑦᑐᒃᑯᑦ, ᑭᓯᐊᓂᑦᑕᐅᖅ ᐱᕙᓪᓕᐊᔪᓕᕆᓂᒃᑯᑦ, ᑲᓇᑕᒥ ᓴᐳᔾᔭᐅᓯᒪᓂᕐᒧᑦ, ᐊᒻᒪᓗ ᓇᒻᒥᓂᖃᕐᓂᖅ ᑲᓇᑕᒥᒃ.

ᑭᓱᑕᖃᕆᐊᖃᒻᒪᖔᑦ ᖃᐅᔨᓴᕐᓂᖅ ᓇᓗᓇᐃᖅᓯᕗᖅ ᐱᓪᓚᑦᑖᒥᒃ ᓱᒃᑲᔪᒃᑯᑦ ᖃᕋᓴᐅᔭᓕᕆᔾᔪᑎᒥᒃ

ᐸᕐᓇᐃᓂᖃᑦᑎᓪᓗᖏᑦ ᓄᓇᕗᑦᒥ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒥᒃ ᐱᕙᓪᓕᐊᔪᓕᕆᔨᒃᑯᑦ ᑎᒥᖓᑕ ᐸᕐᓇᐅᑎᖓᓂᒃ, ᑭᓱᑕᖃᕆᐊᖃᒻᒪᖔᑦ ᖃᐅᔨᓴᒻᒪᕆᓐᓂᖃᓚᐅᖅᑐᒍᑦ. ᐃᓘᓇᑎᒃ ᑕᑯᓚᐅᖅᑐᑦ ᐃᑲᔫᑎᖃᕐᓂᐊᕐᓂᖓᓂᒃ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᖅ ᐅᖓᓯᒃᑐᒃᑯᑦ ᐃᓕᓐᓂᐊᕐᓂᕐᒧᑦ ᐊᒻᒪᓗ ᐱᓕᒻᒪᔅᓴᕐᓂᕐᒧᑦ, ᐊᐅᓚᑦᑎᓂᕐᒧᑦ, ᓄᓇᑖᕈᑎᑦ ᐊᑐᓕᖅᑎᑕᐅᓂᖏᓐᓄᑦ, ᐱᓕᕆᓂᒃᑯᑦ ᐱᕙᓪᓕᐊᓂᒃᑯᑦ, ᓂᐅᕐᕈᑎᖃᕋᓱᐊᕐᓂᒃᑯᑦ, ᐳᓚᕋᖅᑐᓕᕆᓂᒃᑯᑦ, ᓴᓇᕈᓘᔭᕐᓂᒃᑯᑦ, ᐊᒻᒪᓗ ᐃᓚᒌᑦ ᐊᒃᑐᐊᖃᑎᒌᓐᓂᖏᑦ, ᖃᐅᔨᒪᓪᓗᒍ ᓄᓇᕗᑦ ᐊᖏᔪᖅᔪᐊᕐᕌᓗᒃ ᓄᓈᓗᐊ.

ᑕᑯᒃᓴᐅᓂᖃᓪᓚᑦᑖᖏᓚᕐᓕ ᑕᒪᓐᓇ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᖅ ᐊᑑᑎᖃᑦᑎᒋᓂᖓ ᓄᓇᓕᓐᓄᑦ ᑐᓴᐅᒪᖃᑦᑕᐅᑎᓂᕐᒧᑦ ᐱᑕᖃᕈᓐᓇᕐᓂᖓ ᓄᓇᕗᑦᒥᐅᑦ ᐱᔪᒪᓂᖏᓐᓂᒃ ᒪᓕᓪᓗᓂ. ᐃᓄᐃᑦ ᑕᐃᒪᓐᖓᓂᒃ ᐅᓂᒃᑲᐅᓯᒃᑯᑦ ᐅᓂᒃᑳᓐᓂᖃᒻᒪᑕ - ᐊᔪᓐᖏᓛᖑᒻᒪᑕ ᐅᓂᒃᑳᕆᐊᕈᑎᒃ ᐊᑐᕐᓗᑎᒃ ᑎᑎᕋᖅᓯᒪᔪᓂᒃ ᐊᒻᒪᓗ ᐅᖃᐅᓯᑐᐃᓐᓇᒃᑯᑦ ᑐᓴᖃᑦᑕᐅᑎᓂᕐᒥᒃ. ᖃᓪᓗᓈᑎᑐᑦ, ᑐᓐᖓᕕᓕᒃ ᑎᑎᕋᖅᓯᒪᔪᒥᒃ ᖃᕋᓴᐅᔭᓕᕆᓂᖅ ᐋᖅᑭᒃᓯᒪᓂᖓ ᐊᑲᐅᓂᖅᓴᐅᒻᒪᑦ ᐃᓄᓪᓚᑦᑖᖑᖏᑦᑐᑦ ᑐᓴᐅᒪᖃᑦᑕᐅᑎᓂᖓᓐᓂᒃ - ᑕᒪᓐᓇ ᐊᔭᐅᖅᑐᐃᓪᓗᓂ ᐃᓄᐃᑦ ᐊᑐᓕᕆᐊᖃᑦᑐᑎᒃ ᑐᓴᐅᒪᖃᑦᑕᐅᑎᓂᕐᒥᒃ ᐃᓄᐃᑦ ᐃᓕᖅᑯᓯᖓᑕ ᐊᑐᖅᑕᑐᖃᕆᖏᑕᖓᓂᒃ ᐊᑐᖃᑕᐅᓂᐊᕐᕈᑎᒃ ᑕᒪᑐᒥᖓ ᓱᒃᑲᐃᑐᒃᑯ ᖃᕋᓴᐅᔭᓕᕆᓂᕐᒥᒃ.

ᓱᒃᑲᔪᒃᑯᑦ ᖃᕋᓴᐅᔭᓕᕆᓂᖅ ᐃᑲᔪᖅᑐᐃᔪᖅ ᐅᖃᐅᓯᒃᑯᑦ ᐃᓕᖅᑯᓯᕐᒥᒃ

ᓱᒃᑲᔪᒃᑯᑦ ᖃᕋᓴᐅᔭᓕᕆᓂᖅ ᐱᕕᖃᑦᑎᑦᑎᓂᐊᖅᐳᖅ ᐃᓄᓐᓂᒃ ᐊᔪᓐᖏᑎᑦᑎᓗᓂ ᑕᐅᑐᓐᓂᒃᑯᑦ ᐊᒻᒪᓗ ᐅᖃᖃᑎᒌᓐᓂᒃᑯᑦ ᑐᓴᐅᒪᖃᑦᑕᐅᑎᓂᕐᒥᒃ ᑕᒪᓐᓇ ᓱᒃᑲᐃᑦᑑᓗᓂ, ᖃᓪᓗᓈᑎᑐᑦ ᑐᓐᖓᕕᓖᑦ ᖃᕋᓴᐅᔭᓕᕆᔾᔪᑏᑦ ᐊᒃᑐᐊᖃᑎᒌᒍᓐᓇᖅᑐᑦ ᑕᒪᑐᒥᖓ ᑲᔪᓯᓂᖃᕈᓐᓇᖏᒻᒪᑕ. ᐃᓄᐃᑦ ᐅᑦᔨᕈᓱᑉᐳᑦ ᐊᔪᓐᓇᖏᑦᑐᓇᕐᓂᖓᓂᒃ ᑕᐅᑐᖃᑦᑕᐅᑎᓗᓂ ᑐᓴᐅᒪᖃᑦᑕᐅᑎᓂᕐᒥᒃ ᐊᑐᖅᑕᐅᔪᓐᓇᖅᑐᓂᒃ ᐊᑑᑎᖃᑦᑎᐊᕐᓗᑎᓪᓗ ᓄᓇᕗᑦ ᐊᐅᓚᑕᐅᓂᖓᓄᑦ, ᐊᒻᒪᓗ ᓴᓐᖏᑦᑎᑕᐅᕙᓪᓕᐊᓂᖓᓄᑦ ᐃᓄᐃᑦ ᐃᓕᖅᑯᓯᖓᓐ.

ᐃᓄᐃᑦ ᐅᓄᕐᓂᖅᓴᐅᑎᓪᓗᒋᑦ ᑕᒫᓂ, ᐃᓄᐃᑦ ᐱᑕᖃᕆᐊᖃᑉᐳᑦ ᑐᓴᐅᒪᖃᑦᑕᐅᑎᒍᓐᓇᐅᑎᓂᒃ ᐊᑑᑎᖃᑦᑎᐊᕈᓐᓇᖅᑐᓂᒃ ᓄᓇᕗᑦᒥ ᐊᐅᓚᑦᑎᓂᕐᒧᑦ, ᑮᓇᐅᔭᓕᐅᕋᓱᐊᕐᓂᕐᒧᑦ ᐱᕈᖅᐸᓪᓕᐊᓂᕐᒧᑦ, ᐃᓚᐅᖃᑕᐅᓂᕐᒧᑦ ᐃᓕᓐᓂᐊᕐᕈᑎᓄᑦ, ᐊᒻᒪᓗ ᐊᐅᓚᑦᑎᓂᕐᒧᑦ ᓄᓇᒥᒃ ᐊᒻᒪᓗ ᐃᒪᖓᓂᒃ ᓄᓇᕗᑦ.

ᐱᑕᖃᕆᐊᖃᑉᐳᖅ ᐊᑭᑐᓗᐊᖏᑦᑐᒥᒃ, ᑲᔪᓰᓐᓇᕈᓐᓇᖅᑐᒥᒃ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒥᒃ ᐱᕕᖃᓪᓗᓂᓗ ᐃᓕᓐᓂᐊᕐᐸᓪᓕᐊᓂᕐᒥᒃ

ᐅᑯᐊ ᖃᐅᔨᓴᖅᑎᓪᓗᑕ ᑐᓴᒐᔪᓚᐅᖅᑕᕗᑦ:

• ᓄᓇᕗᒻᒥᐅᑦ ᐊᑐᖅᑎᐊᕐᓂᐊᖅᑐᑦ ᓱᒃᑲᔪᒃᑯᑦ ᖃᕋᓴᐅᔭᓕᕆᔾᔪᑎᓂᒃ - ᐱᓗᐊᖅᑐᒥᒃ ᐱᓪᓚᕆᐅᓂᖅᓴᐅᔪᓂᒃ ᓲᕐᓗ ᑕᐅᑐᖃᑦᑕᐅᑎᓂᒃᑯᑦ ᑲᑎᒪᓂᖅ ᐊᒻᒪᓗ ᑎᑎᖅᑲᓂᒃ ᑕᑯᖃᑎᒌᖃᑦᑕᕐᓂᖅ;
• ᓱᒃᑲᔪᒃᑯᑦ ᖃᕋᓴᐅᔭᓕᕆᓂᖅ ᐊᑭᑐᔪᐊᓘᔭᕆᐊᖃᖏᓚᖅ ᑖᒃᓱᒧᖓ ᐊᑐᖅᑎᐅᓂᐊᖅᑐᒧᑦ - ᐊᑦᔨᖃᐸᓗᒍᓐᓇᕐᓗᓂ ᖃᓪᓗᓈᑦ ᓄᓇᖓᓂ ᐊᑭᓕᖅᓱᖅᑕᐅᕙᑦᑐᑎᑐᑦ;
• ᓈᒻᒪᑦᑐᒥᒃ ᐃᓕᓐᓂᐊᕐᑎᑦᑎᕙᓪᓕᐊᓂᖅ ᐊᒻᒪᓗ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᒋᔭᕆᐊᖃᑦᑕᖏᑦ ᓄᓇᓕᓐᓂ ᐱᑕᖃᕆᐊᖃᑉᐳᖅ ᐊᑐᖅᑕᐅᑦᑎᐊᖁᓪᓗᒍ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᖅ.

ᓇᒻᒥᓂᖃᑦᑐᑦ ᐱᔪᓐᓇᑎᑦᑎᔾᔪᑎᖏᑦ ᐃᓚᖃᓪᓗᑎᒃ ᓄᓇᓕᓐᓂᑦᑐᓂᒃ

NBDC-ᑯᑦ ᓇᓗᓇᐃᖅᓯᓯᒪᕗᑦ ᐱᑕᖃᕆᐊᖃᕐᓂᖓᓂᒃ ᖃᖓᑦᑕᖅᑎᑕᐅᓯᒪᔪᒃᑯᑦ ᖃᕋᓴᐅᔭᓕᕆᔾᔪᑎᓂᒃ, ᐊᒻᒪᓗ ᑕᐃᒪᐃᒻᒪᑦ ᐋᖅᑭᒃᓯᓯᒪᓪᓗᑎᒃ ᐊᑐᖅᑕᐅᒐᔭᓐᖑᐊᖅᑐᓂᒃ ᓇᒻᒥᓂᖃᑦᑐᓂᒃ ᐊᑐᕐᓗᑎᒃ ᓴᓇᔪᓐᓇᖁᓪᓗᒋᑦ ᐱᓕᕆᔾᔪᑎᐅᓂᐊᖅᑐᒥᒃ. ᐱᓗᐊᖅᑐᒥᒃ ᐃᓱᒪᒋᔭᐅᓯᒪᕗᖅ ᐃᑲᔪᖅᑐᖅᑕᐅᖁᓪᓗᒋᑦ ᓄᓇᓕᓐᓂ ᓇᒻᒥᓂᕆᔭᐅᔪᑦ ᐊᒻᒪᓗ ᑎᒥᐅᔪᑦ ᓄᓇᕗᒻᒦᑦᑐᑦ ᐃᓚᐅᖃᑕᐅᖁᓪᓗᒋᑦ. ᖃᐅᔨᒪᔪᒍᑦ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᖅ ᑲᔪᓯᑦᑎᐊᕐᓂᐊᖅᐸᑦ ᓄᓇᑦᑎᓐᓂ ᐃᒪᐃᑦᑕᕆᐊᖃᑉᐳᖅ - ᐋᖅᑭᒃᓯᔭᕆᐊᖃᑉᐳᒍᑦ ᓄᓇᓕᓐᓂ ᖃᐅᔨᒪᔨᑕᐅᓂᐊᖅᑐᓂᒃ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᐅᔪᒥᒃ, ᑭᒃᑯᑐᐃᓐᓇᕐᓂᒃ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐊᑐᖅᑕᐅᔾᔪᑎᖏᓐᓂᒃ, ᐊᒻᒪᓗ ᓄᓇᓕᓐᓂ ᑮᓇᐅᔭᖃᕋᓱᐊᕐᓂᕐᒧᑦ ᐱᕙᓪᓕᐊᓂᕐᒥᒃ.

ᑭᒃᑯᑐᐃᓐᓇᕐᓄᑦ ᑮᓇᐅᔭᐃᑦ ᐱᒋᐊᖅᑎᑦᑎᔾᔪᑕᐅᓂᐊᖅᐳᑦ ᐱᖁᑎᓂᒃ ᐋᖅᑭᒃᓱᐃᕙᓪᓕᐊᓂᕐᒧᑦ

ᐱᓕᕆᓂᕐᒧᑦ ᐸᕐᓇᐅᑎᕗᑦ ᓇᓗᓇᐃᖅᓯᓯᒪᕗᖅ ᖃᓄᖅ ᐊᑲᐅᓛᖑᔪᒥᒃ ᐋᖅᑮᕙᓪᓕᐊᔪᓐᓇᕐᒪᖔᑦᑕ ᐱᖁᑎᕐᔪᐊᓂᒃ ᐊᖑᒻᒪᑎᖁᓪᓗᑕ ᖃᖓᑦᑕᖅᑎᑕᐅᓯᒪᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐊᑐᖅᑕᐅᔭᕆᐊᖃᑦᑐᓂᒃ ᓄᓇᕗᒻᒥᐅᓄᑦ ᐱᔪᒪᓂᖏᑦ ᒪᓕᓪᓗᒋᑦ - ᐊᑭᑐᓗᐊᖏᑦᑐᒥᒃ. ᑕᒪᒃᑯᐊ ᐋᖅᑭᒃᑕᐅᔭᕆᖅᐊᑕ, ᓄᓇᑦᑎᓐᓂ ᑎᒥᐅᔪᑦ, ᐃᓄᐃᑦ ᑲᑐᔾᔨᖃᑎᒌᑦ, ᓇᒻᒥᓂᕆᔭᐅᔪᑦ ᐊᒻᒪᓗ ᓄᓇᖃᑦᑎᐅᔪᑦ ᓇᓗᓇᓐᖏᒻᒪᑦ ᐃᓚᒋᓕᐅᑎᓂᐊᖅᑐᑦ. ᓯᕗᓪᓕᖅᐹᒥ ᐱᖁᑎᕐᔪᐊᓄᑦ ᑮᓇᐅᔭᑦ ᐊᑭᓖᔾᔪᑕᐅᔭᕆᐊᓕᑦ ᓄᓇᕗᑦᒥ ᐱᒋᐊᖅᑎᑎᔾᔪᑕᐅᓂᐊᖅᐳᑦ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ, ᐊᒻᒪᓗ ᓄᓇᕗᒻᒥᐅᓂᒃ ᑕᒪᓐᓇ ᑲᔪᓯᑎᑕᐅᓂᐊᖅᑐᓂ.

2003-2008 ᐱᖁᑎᕐᔪᐊᓂᒃ ᐱᓕᕆᓂᖅ I – ᓴᓇᕙᓪᓕᐊᓂᖅ ᕿᓂᖅ ᖃᓴᐅᔭᓕᕆᔾᔪᑎᒥᒃ

NBDC-ᑯᑦ ᓯᕗᓪᓕᖅᐹᒥᒃ ᐱᓕᕆᐊᕆᓚᐅᖅᐹ ᕿᓂᖅ ᖃᕋᓴᐅᔭᓕᕆᔾᔪᑎ ᐊᑐᖅᑕᐅᖁᓪᓗᒍ ᑭᒃᑯᑐᐃᓐᓇᕐᓄᑦ. ᑲᓇᑕᒥ ᐱᖁᑎᕐᔪᐊᓕᕆᓂᕐᒧᑦ ᖃᖓᑦᑕᖅᑎᑕᐅᓯᒪᔪᒃᑯᑦ (NSI) ᐱᓕᕆᐊᖃᕐᓂᕐᒧᑦ ᑐᓂᓯᓚᐅᖅᐳᑦ ᑖᒃᑯᓄᖓ NBDC-ᑯᓐᓄᑦ ᐃᑲᔫᑎᒥᓐᓂᒃ ᐊᑭᓖᔾᔪᑎᔅᓴᓂᒃ ᐊᑭᑐᔪᐊᓗᑎᓪᓗᒍ ᖃᖓᑦᑕᖅᑎᑕᐅᓯᒪᔪᒃᑯᑦ ᐊᑐᖅᑕᐅᔭᕆᐊᖃᑦᑐᑦ ᐱᒋᐊᓕᓵᖅᑎᓪᓗᒋᑦ ᑖᒃᑯᐊ ᕿᓂᖅ (ᓴᓇᔭᐅᓪᓗᓂ SSI Micro-ᑯᓐᓄᑦ, ᓵᓚᖃᑦᑐᕕᓃᑦ ᐊᑭᑦᑐᕋᐅᑎᓂᒃ ᓴᖅᑭᔮᖅᑎᑦᑎᔪᖃᑦᑎᓪᓗᒍ ᕿᓂᖅ ᓴᓇᔭᐅᓂᖓᓄᑦ 2004-ᒥ) NSI -ᑯᑦ ᐋᖅᑭᒃᑕᐅᓚᐅᖅᓯᒪᕗᑦ ᐃᑲᔪᕈᓐᓇᖁᓪᓗᒋᑦ ᐊᑭᑐᖅᔪᐊᕐᓗᐊᖅᑐᐊᓘᓂᖓᓂᒃ ᖃᖓᑦᑕᖅᑎᑕᐅᓯᒪᔪᑦ ᐊᑐᖅᑕᐅᓂᖏᓐᓄᑦ ᐅᑭᐅᖅᑕᖅᑐᒥ ᓄᓇᓕᓐᓂ, ᐱᑦᔪᑎᖃᕋᓱᐊᖅᑐᑎᒃ ᑕᒪᒃᑯᐊ ᐊᑐᕈᒪᔪᑦ ᑐᓴᐅᒪᖃᑦᑕᐅᑎᔾᔪᑎᓂᒃ ᐊᑭᑭᔾᔫᒥᓈᖅᓯᓂᐊᕐᒪᑕ. ᑕᒪᕐᒥᑦᑎᐊᖅ NSI-ᑯᓐᓂᑦ ᑐᓂᔭᐅᓯᒪᔪᑦ ᑮᓇᐅᔭᑦ ᐊᑐᖅᑕᐅᓯᒪᕗᑦ ᖃᖓᑦᑕᖅᑎᑕᐅᓯᒪᔪᒃᑯᑦ ᓴᓐᖏᓂᖓᓄᑦ.

ᕿᓂᖅ ᐋᖅᑭᒃᓯᒪᓂᖓ ᐱᒋᐊᖅᑎᑕᐅᓚᐅᖅᐳᖅ 2005-ᒥ ᑖᓐᓇ NBDC-ᑯᓐᓂᑦ ᓯᕗᓪᓕᖅᐹᒥᒃ ᖃᖓᑦᑕᖅᑎᑕᐅᓯᒪᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᒋᐊᕈᑕᐅᓪᓗᓂ. ᐱᑕᖃᓚᐅᖅᐳᖅ ᐱᖁᑎᓂᒃ ᓇᒻᒥᓂᕆᔭᐅᔪᓂᒃ ᓲᕐᓗ ᐸᓕᐊᓐᖑᐊᓂᒃ ᐊᒻᒪᓗ ᐊᔪᓐᖏᔾᔪᑎᓂᒃ ᐊᑐᕈᓐᓇᖅᑐᓂᒃ ᐱᖁᑎᕐᔪᐊᓄᑦ. ᕿᓂᖅ ᐱᔨᑦᑎᖅᐳᖅ 25-ᓂᒃ ᓄᓇᓕᓐᓂᒃ ᓄᓇᕗᒻᒦᑦᑐᓂᒃ, ᐊᒻᒪᓗ ᒫᓐᓇᐅᔪᖅ 4,000-ᓂᒃ ᐃᓚᒋᔭᐅᔪᖁᑎᖃᑉᐳᖅ - ᐃᓪᓗᒋᔭᐅᔪᓕᒫᑦ ᐊᕐᕙᖏᑦ. ᑐᑭᓯᒋᐊᒃᑲᓐᓂᕈᒪᒍᕕᑦ ᕿᓂᖅ ᒥᒃᓵᓄᑦ ᐅᕝᕙᓘᓐᓃᑦ ᐃᓚᒋᔭᐅᔪᒪᒍᕕᑦ, ᐅᐸᓪᓗᒍ www.qiniq.com.

ᐃᑲᔪᖅᑕᐅᓂᖓ ᓄᓇᓕᓐᓂ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕋᖅᑎᐅᔪᑦ (CSP)

ᕿᓂᖅ ᐋᖅᑭᒃᓯᒪᓂᖓ ᒪᓕᒃᑐᒍ, ᓄᓇᕗᒻᒥ ᓄᓇᓕᓕᒫᑦ ᐱᑕᖃᑉᐳᑦ ᐃᓕᓐᓂᐊᖅᓯᒪᔪᒥᒃ ᓄᓇᓕᓐᓂ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕋᖅᑎᐅᔪᓂᒃ ᐃᑲᔪᖅᑐᐃᖁᓪᓗᒋᑦ ᐊᒻᒪᓗ ᐃᑲᔪᖃᑦᑕᕐᓗᑎᒃ ᐊᐅᓚᑦᑎᓂᕐᒧᑦ. ᕿᓂᖅ ᐃᓚᒋᔭᐅᔪᖁᑎᖏᑕ ᑮᓇᐅᔭᐃᔭᐅᑎᖏᑦ 20-ᐳᓴᖓ ᑐᓂᔭᐅᖃᑦᑕᖅᐳᖅ ᑖᒃᑯᓄᖓ ᓄᓇᓕᓐᓂ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕋᖅᑎᐅᔪᓄᑦ. CSP 21-ᖑᒻᒪᑕ ᑲᑉᐸᓂᐅᔪᑦ ᑕᕝᕙᓐᖓᑦ 18-ᖑᔪᑦ ᐃᓄᓐᓄᑦ ᓇᒻᒥᓂᕆᔭᐅᓪᓗᑎᒃ. ᓄᓇᑦᓯᓐᓂ CSP-ᒥᒃ ᖃᐅᔨᒋᐊᕈᒪᒍᕕᑦ ᐅᐸᓪᓗᒍ http://www.qiniq.com/get-connected.

ᑮᓇᐅᔭᖃᑦᑎᑕᐅᓂᖓ ᕿᓂᖅ ᐊᒻᒪᓗ NBDC ᐱᓕᕆᐊᖏᑦ

NBDC-ᑯᑦ ᐱᓕᕆᓯᒪᕗᑦ R & D ᐊᑦᔨᒌᖏᑦᑐᓂᒃ ᐊᑐᖅᑕᐅᔪᓐᓇᖅᑐᓂᒃ ᐊᒻᒪᓗ ᐱᓕᕆᐊᕐᖑᒍᓐᓇᖅᑐᓂᒃ, ᐊᒻᒪᓗᒃᑲᓐᓂᖅ ᐃᓕᓐᓂᐊᕐᑎᑦᑎᓂᕐᒥᒃ ᐱᓕᕆᔾᔪᑎᖃᑦᑎᐊᕐᓗᑎᒃ ᑖᒃᑯᓂᖓ CSP-ᓂᑦ. ᐊᑖᓂ ᑎᑎᕋᖅᓯᒪᔪᖅ ᓇᓗᓇᐃᖅᓯᕗᖅ ᑮᓇᐅᔭᐃᑦ ᐊᑐᖅᑕᐅᓂᖏᑦ ᑕᒪᒃᑮᓐᓄᑦ ᕿᓂᖅ ᐊᒻᒪᓗ NBDC-ᑯᑦ ᐱᓕᕆᐊᕐᖏᓐᓄᑦ 2003-ᒥᑦ 2008-ᒧᑦ.

ᕿᓂᐅᑉ ᑲᔪᓯᑦᑎᐊᖅᑐᒻᒪᕆᐊᓘᓯᒪᓂᖓ, ᐊᒻᒪᓗ ᐱᑕᖃᕆᐊᖃᕐᓂᖓ ᐃᑲᔪᖅᑐᖅᑕᐅᓂᖓ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕈᑎᐅᔪᑦ ᓄᓇᖃᑦᑎᐅᔪᓄᑦ, ᐊᒻᒪᓗ ᑮᓇᐅᔭᓕᕆᓂᕐᒧᑦ ᑲᒪᒋᕙᓪᓕᐊᔭᖏᑦ ᑐᑭᖃᑉᐳᑦ NBDC-ᑯᑦ ᐃᒻᒥᓐᓂᒃ ᐊᖏᓪᓕᒋᐊᕆᐊᖃᒻᒥᔪᑦ. NBDC-ᑯᑦ ᑲᔪᓯᔪᒥᒃ ᐋᖅᑭᐸᓪᓕᐊᕗᑦ ᑕᒪᑐᒥᖓ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒥᒃ ᓄᓇᕗᑦᒥ ᐊᑲᐅᓯᕙᓪᓕᐊᖁᓪᓗᒍ ᓄᓇᓕᓐᓄᑦ ᐊᒻᒪᓗ ᑮᓇᐅᔭᓕᕆᓂᕐᒧᑦ, ᐊᒻᒪᓗᒃᑕᐅᖅ ᑲᔪᓯᕙᓪᓕᐊᒋᕗᒍᑦ NBDC-ᑯᑦ ᐊᖏᓪᓕᕙᓪᓕᐊᖁᓪᓗᒍ ᐱᔪᓐᓇᐅᑏᑦ ᑕᒪᓐᓇ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᖅ ᐃᑲᔪᕈᓐᓇᖁᓪᓗᒍ.

ᖃᓄᖅ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᖅ ᐱᒋᐊᕐᓂᑰᒻᒪᖔᑦ: ᐋᖅᑭᒃᑕᐅᕙᓪᓕᐊᓂᖓ ᓯᕗᓪᓕᖅᐸᒥᒃ NBDC-ᑯᑦ ᐱᓕᕆᓂᕐᒧᑦ ᐸᕐᓇᐅᑎᖓ 2003

ᐋᖅᑭᓱᖅᑕᐅᕙᓪᓕᐊᑎᓪᓗᒍ NBDC-ᑯᑦ ᐱᓕᕆᓂᕐᒧᑦ ᐸᕐᓇᐅᑎᖓᓐ 2003-ᒥ, ᑐᓴᖃᑦᑕᓚᐅᕐᕋᑦᑕ ᐃᓄᓐᓂᒃ ᓄᓇᕗᒻᒦᖔᖅᓯᒪᔪᓂᒃ ᑎᑎᖅᑲᑎᒍᑦ, ᐅᖄᓚᐅᑎᒃᑯ, ᖃᕋᓴᐅᔭᒃᑯᑦ, ᐊᒻᒪᓗ ᑭᒃᑯᑐᐃᓐᓇᕐᓄᑦ ᐊᑎᓕᐅᖅᑕᐅᓯᒪᔪᑎᒍᑦ ᓇᓗᓇᐃᖅᓯᒪᔪᒥᒃ ᐱᔪᒪᓂᖃᓐᓂᕐᒥᓐᓂᒃ ᓱᒃᑲᔪᒃᑯᑦ ᖃᕋᓴᐅᔭᓕᕆᔾᔪᑎᓂᒃ.

ᖁᔭᓐᓇᒦᖅᐸᕗᑦ ᑕᐃᒃᑯᐊ 300-ᖑᔪᑦ ᑕᑕᑎᕆᔪᓐᓇᓚᐅᖅᑐᑦ ᐊᐱᖅᑯᑎᑦᑎᓐᓂᒃ - ᓇᓗᓇᓐᖏᑎᐊᖅᑐᒥᒃ ᑐᓐᖓᕕᑦᑖᖅᕕᒋᔪᓐᓇᓚᐅᕐᕋᑦᑎᒍ ᖃᐅᔨᓇᓱᐊᖅᑎᓪᓗᑕ ᓄᓇᕗᒻᒥᐅᑦ ᐱᔭᕆᐊᖃᓐᓂᕆᔭᖓᓂᒃ ᓱᒃᑲᔪᒃᑯᑦ ᖃᕋᓴᐅᔭᓕᕆᔾᔪᑎᓂᒃ. ᐊᒻᒪᓗᒃᑕᐅᖅ ᖁᔭᓐᓇᒦᕆᕙᕗᑦ 400-ᖑᔪᑦ ᐃᓄᐃᑦ ᐊᑎᓕᐅᖃᑦᑕᓚᐅᖅᑐᑦ ᓄᓇᓕᓐᓂ ᓄᓇᕗᓕᒫᒥ. ᑕᒪᒃᑯᐊ ᑐᓴᓚᐅᖅᑕᕗᑦ ᐊᒻᒪᓗ ᐃᑲᔪᖅᑐᖅᑕᐅᓂᕆᓚᐅᖅᑕᕗᑦ ᓄᓇᓕᑦᑕ ᐃᓄᖁᑎᖏᓐᓂᒃ ᐊᑑᑎᖃᒻᒪᕆᓚᐅᖅᐳᑦ ᐋᖅᑭᒃᓯᓇᓱᐊᖅᑎᓪᓗᑕ ᑐᓐᖓᕕᖃᑦᑎᐊᖅᑐᒥᒃ ᐱᓕᕆᓂᕐᒧᑦ ᐸᕐᓇᐅᑎᓕᐅᕋᓱᒃᑎᓪᓗᑕ.

ᑭᒃᑯᑐᐃᓐᓇᐃᑦ ᐃᓚᒋᔭᐅᓕᕈᒪᔪᑦ NBDC-ᑯᓐᓄᑦ - ᐅᖃᓕᒫᓚᐅᕐᕆᑦ About NBDC ᑐᑭᓯᑦᑎᐅᕐᓂᐊᕐᕋᕕᑦ.