ᓄᓇᕗᑦᒥ ᓱᒃᑲᔪᒃᑯᑦ ᖃᕆᑕᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔨᒃᑯᑦ ᑎᒥᖓᑦ ᐱᓕᕆᓂᖃᒻᒪᑕ ᐃᓄᐃᑦ ᐊᑐᕋᔅᓴᑦᑎᐊᕙᒻᒥᒃ, ᐊᑭᑐᓗᐊᖏᑦᑐᒥᒃ ᐊᖅᑯᑎᖃᑦᑎᐊᕈᓐᓇᖁᓪᓗᒋᑦ ᓱᒃᑲᔪᒃᑯᑦ ᐱᔨᑦᑎᕋᐅᑎᓄᑦ ᐃᓘᓇᑦᑎᐊᖏᓐᓂ ᓄᓇᕗᑦ ᓄᓇᓕᖏᓐᓂ. ᑮᓇᐅᔭᓕᐅᕋᓱᐊᖅᑎᐅᖏᑦᑐᑎᒃ ᑎᒥᐅᔪᑦ ᐅᖓᑖᓃᑦᑐᓂᒃ 70 ᐃᓚᒋᔭᐅᔪᖁᑎᖃᑦᑐᑎᒃ, ᑖᒃᑯᐊ NBDC-ᑯᑦ ᑐᑭᒧᐊᑦᑎᑕᐅᔪᑦ ᐃᑲᔪᖅᑎᓄᑦ ᑲᑎᒪᔨᓄᑦ ᓂᕈᐊᖅᑕᐅᓯᒪᔪᑦ ᐃᓚᒋᔭᐅᔪᓄᑦ. ᑭᓇᑐᐃᓐᓇᖅ ᐃᓚᒋᔭᐅᔪᓐᓇᖅᑐᖅ ᑖᒃᑯᓄᖓ NBDC-ᑯᓐᓄᑦ ᓄᓇᕗᒻᒥᐅᑕᐅᒍᑎᒃ. (ᖃᕋᓴᐅᔭᒨᖅᑕᐅᔪᓐᓇᖅᑐᑦ ᐃᓚᒋᔭᐅᔪᒪᔪᓄᑦ ᑎᑎᕋᕆᐊᓖᑦ ᐅᕙᓐᖓᑦ.)

NBDC-ᑯᑦ ᑎᓴᒪᓂᒃ ᐃᖅᑲᓇᐃᔭᓖᑦ ᐊᕐᕌᒎᓂᐊᖅᑐᓂ ᐱᓕᕆᓇᓱᐊᖅᑎᓪᓗᖏᑦ ᐱᓕᕆᐊᒃᓴᒥᓂᒃ ᐊᑭᑐᓗᐊᖏᑦᑐᒥᒃ, ᐊᑐᕋᔅᓴᑦᑎᐊᕙᒻᒥᒃ, ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕋᐅᑎᓂᒃ ᓄᓇᓕᓐᓂ.

• ᑕᒪᒃᑯᐊ ᐱᓕᕆᔾᔪᑎᑦ ᐊᖏᔫᑎᑦ ᓴᓇᔭᐅᓯᒪᔪᑦ ᓇᒻᒥᓂᖃᑦᑎᐅᔪᓄᑦ ᐱᑕᖃᑦᑎᑦᑎᓗᑎᒃ ᐊᑐᕋᔅᓴᑦᑎᐊᕙᒻᒥᒃ, ᐊᑭᑐᓗᐊᖏᑦᑐᒥᒃ ᐱᔨᑦᑎᕈᑎᒥᒃ….ᐊᒻᒪᓗ ᐅᐊᑦᑎᔨᐅᓗᓂ ᑭᒡᒐᖅᑐᐃᓗᓂ ᐃᓄᓐᓂᒃ.
• ᐱᕙᓪᓕᐊᑎᓪᓗᒍ ᐱᕙᓪᓕᐊᓂᕆᔭᖓ ᐊᑐᖅᑕᐅᖃᑦᑕᖅᑐᑦ ᐃᓄᓐᓄᑦ ᐱᔪᒫᕆᔭᐅᔪᑦ - ᑐᓴᐅᒪᖃᑎᒌᓐᓂᖅ ᓄᓇᓕᑦᑎᒍᑦ…ᓇᓗᓇᐃᖅᑎᕆᓂᖅ ᑮᓇᐅᔭᖅᑖᖅᕕᐅᔪᓐᓇᖅᑐᓂᒃ ᐊᒻᒪᓗ ᑮᓇᐅᔭᑦ ᐃᓵᑎᓪᓗᒋᑦ ᑕᒪᒃᑯᓄᖓ ᓄᓇᕗᑦᒥ ᑲᑉᐸᓂᐅᔪᓄᑦ, ᑲᑐᔾᔨᖃᑎᒌᓄᑦ ᐱᕙᓪᓕᐊᑎᑦᑎᓗᑎᒃ ᓄᓇᕗᒻᒥ ᖃᓄᖅᑐᕈᑎᓕᐊᖑᓯᒪᔪᓂᒃ.
• ᐱᕙᓪᓕᐊᑎᓪᓗᒍ ICT (ᑐᓴᐅᒪᖃᑦᑕᐅᑎᓂᕐᒧᑦ ᐊᒻᒪᓗ ᐅᖃᖃᑎᒌᒍᓐᓇᓂᕐᒧᑦ ᓄᑖᓐᖑᖅᐸᓪᓕᐊᓂᖅ) ᐱᓕᒻᒪᔅᓴᐃᓂᕐᒧᑦ ᐱᕕᒃᓴᖃᖅᕕᐅᔪᓂᒃ ᐱᒋᐊᖅᑎᑦᑎᓂᒃᑯᑦ ᐱᒻᒪᕆᐅᔪᒥᒃ ICT ᐱᓕᕆᕝᕕᒻᒥᒃ ᐊᔪᓐᖏᓂᖅᐹᓄᑦ ᐱᓕᒻᒪᔅᓴᐃᓂᕐᒧᑦ ᓄᓇᓕᓐᓂ ᑭᒡᒐᑐᖅᑎᐅᔪᓂᒃ ᐊᔪᕈᓐᓃᐹᓪᓕᕈᓐᓇᖁᓪᓗᒋᑦ ᐊᑐᕐᓗᑎᒃ ICT-ᒥᒃ ᐃᑲᔫᑎᐅᓗᓂ ᓄᓇᓕᖏᓐᓄᑦ;
• ᐃᑲᔪᕐᓗᒋᑦ ᓄᓇᓕᓐᓂ ᓇᒻᒥᓂᖃᑦᑎᐅᔪᑦ ᐊᒻᒪᓗ ᑲᑐᔾᔨᖃᑎᒌᑦ ᓱᒃᑲᔪᒃᑯᑦ ᐱᔨᑦᑎᕈᑎᖃᑦᑎᑦᑎᓗᑎᒃ -- ᓄᓇᓕᓕᒫᑦ ᓄᓇᓕᓐᓂ ᐃᑲᔪᖅᑕᐅᔪᓐᓇᖁᓪᓗᒋᑦ ᓱᒃᑲᔪᒃᑯᑦ ᖃᕆᑕᐅᔭᓕᕆᓂᕐᒧᑦ.

ᑭᒃᑰᒻᒪᑕ ᓄᓇᕗᑦᒥ ᓱᒃᑲᔪᒃᑯᑦ ᖃᕆᑕᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔨᒃᑯᑦ ᑎᒥᖓᑦ?

ᑖᒃᑯᐊ ᓄᓇᕗᑦᒥ ᓱᒃᑲᔪᒃᑯᑦ ᖃᕆᑕᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔨᒃᑯᑦ ᑎᒥᖓᑦ (NBDC) ᓴᖅᑭᑕᐅᓚᐅᖅᓯᒪᔪᖅ ᐃᓚᒋᔭᐅᔪᖁᑎᖏᓐᓄᑦ ᓄᓇᕗᑦᒥ ᓱᒃᑲᔪᒃᑯᑦ ᐱᓕᕆᔨᐅᑲᐃᓐᓇᖅᑐᓄᑦ ᓄᓇᓖᑦ, ᑲᑉᐸᓂᐅᔪᑦ, ᑲᑐᔾᔨᖃᑎᒌᑦ ᐊᒻᒪᓗ ᑭᒃᑯᑐᐃᓐᓇᐃᑦ ᐱᔨᑦᑎᖅᑕᐅᖏᑦᑐᑦ ᐅᓪᓗᒥᐅᔪᖅ ᒐᕙᒪᒃᑯᑦ ᖃᕋᓴᐅᔭᓕᕆᔾᔪᑎᖏᓐᓄᑦ ᐋᖅᑭᒃᑕᐅᓯᒪᒍᓐᓇᖁᓪᓗᒋᑦ ᐊᖅᑯᑎᑖᖅᑎᑕᐅᓗᑎᒃ ᓱᒃᑲᔪᒃᑯᑦ ᐊᑭᑐᓗᐊᖏᑦᑐᒃᑯᑦ.

NBDC-ᑯᑦ ᑮᓇᐅᔭᓕᐅᕋᓱᐊᖅᑎᐅᖏᑦᑐᑦ, ᐊᐅᓚᑕᐅᔪᑦ ᓄᓇᕗᒻᒥᐅᑕᓄᑦ. ᐃᓚᒋᔭᐅᔪᖁᑎᓖᑦ ᐱᓕᕆᔪᒪᑦᑎᐊᖅᑐᓂᒃ ᓄᓇᖃᑦᑎᐅᔪᓂᒃ ᓇᑭᑑᐃᓐᓈᖓᔪᑦ ᐊᒥᓱᓂᒃ ᐱᓕᕆᓂᖃᖅᓯᒪᔪᑦ, ᐱᖃᓯᐅᑎᓪᓗᒍ ᐃᓄᓐᓂᒃ, ᐊᒻᒪᓗ ᐃᓄᐃᑦ ᐱᓕᕆᔪᑦ ᓇᒻᒥᓂᖁᑎᒋᔭᐅᔪᓄᑦ ᑲᑉᐸᓂᐅᔪᓄᑦ, ᐃᓄᐃᑦ ᑲᑐᔾᔨᖃᑎᒌᖏᑦ, ᓄᓇᓕᑦ ᑲᑐᔾᔨᖃᑎᒌᖏᑦ, ᐊᒻᒪᓗ ᕼᐋᒻᓚᒃᑯᓐᓄᑦ - ᒪᓕᒃᑕᐅᔭᕆᐊᖃᑦᑐᖁᑎᑐᐊᖓ ᐃᓚᒋᔭᐅᓂᐊᕐᓗᓂ ᓄᓇᖃᕆᐊᖃᕐᓂᖅ ᓄᓇᕗᑦᒥ. ᒫᓐᓇᐅᔪᖅ 57%-ᖏᑦ NBDC-ᑯᓐᓄᑦ ᐃᓚᒋᔭᐅᔪᑦ ᐃᓅᔪᑦ ᓄᓇᑖᖃᑕᐅᓯᒪᔪᑦ, (NLCA). ᑭᓇᑐᐃᓐᓇᖅ ᓄᓇᕗᑦᒥ ᐊᑎᓕᐅᖃᑕᐅᔪᓐᓇᖅᑐᖅ ᐃᓚᒋᔭᐅᔪᒪᒍᓂ.

ᓄᓇᕗᑦᒥ ᓱᒃᑲᔪᒃᑯᑦ ᖃᕆᑕᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔨᒃᑯᑦ ᑎᒥᖓᑦ ᓇᒻᒥᓂᖃᑦᑐᖅ 100% ᐃᓚᒋᔭᐅᔪᖁᑎᖏᓐᓂᒃ ᑯᐊᐳᕋᐃᓴᓐᑯᑦ, NBDC ᑎᒥᖓᑦ, ᐃᓕᑕᕆᔭᐅᓯᒪᔪᖅ ᐃᓄᓐᓄᑦ ᓇᒻᒥᓂᖁᑎᒋᔭᐅᒋᐊᖓᓂᒃ ᓄᓇᑖᕈᑎᑎᒍᑦ. NBDC ᑎᒥᖓᑦ ᐱᖁᑎᓕᒃ ᕿᓂᖅᒥᑦ, ᑖᓐᓇ ᓄᑖᖅ ᖃᕋᓴᐅᔭᓕᕆᔾᔪᑎ ᐋᖅᑭᒃᑕᐅᓯᒪᔪᖅ ᐃᑲᔫᑕᐅᓂᐊᖅᑐᓂᒃ ᓄᓇᖃᑦᑎᐅᔪᓄᑦ ᓄᓇᕗᑦᒥ, ᐊᐅᓚᑕᐅᓪᓗᓂ ᓄᓇᕗᑦᒥ ᓱᒃᑲᔪᒃᑯᑦ ᖃᕆᑕᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔨᒃᑯᑦ ᑎᒥᖓᑕ ᑲᑎᒪᔨᖏᓐᓄᑦ.

ᐃᓚᒋᔭᐅᓚᐅᕐᕆᑦ

ᖃᕋᓴᐅᔭᒨᕈᓐᓇᖅᑕᐃᑦ ᐃᓚᒋᔭᐅᔾᔪᑎᒧᑦ ᑎᑎᕋᖅᕕᒃ, ᑎᑎᕋᓪᓗᒍ, ᓱᒃᑲᔪᒃᑯᑦ ᐊᐅᓚᑎᓪᓗᒍ ᐅᕗᖓ (866) 383-6315. ᐊᑭᖃᖏᑦᑐᖅ. ᐱᒐᔭᖅᑐᑎᑦ ᐅᓪᓗᒥᒨᖓᔪᓂᒃ ᑐᓴᕋᔅᓴᓂᒃ ᖃᕋᓴᐅᔭᒃᑯᑦ ᐱᕙᓪᓕᐊᓂᕆᔭᖓᓄᑦ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕈᑎᓂᒃ ᓄᓇᕗᑦᒥ. ᐃᓚᒋᔭᐅᔾᔪᑏᑦ ᐃᓕᓐᓂᒃ ᓂᕈᐊᕈᓐᓇᑎᑦᑎᓂᐊᖅᑐᖅ ᑲᑎᒪᔨᖏᓐᓄᑦ ᑖᒃᑯᐊ NBDC ᐊᕐᕌᒍᑕᒫᖅᓯᐅᑎᒥᒃ ᑲᑎᒪᓂᖃᓕᕋᐃᑉᐸᑕ.

ᐊᐅᓚᑦᑎᔩᑦ

NBDC-ᑯᑦ ᐊᐅᓚᑦᑎᔨᖏᑦ ᐃᖃᓗᓐᓃᑦᑐᑦ.

ᐅᐊᓇ ᓯᐸᐃᓄ, ᑐᑭᒧᐊᑦᑎᒋᔭᐅᑲᐃᓐᓇᖅᑐᖅ ᐊᒻᒪᓗ ᐱᓕᕆᐊᒃᓴᓄᑦ ᐊᖓᔪᑳᖑᓪᓗᓂ  
ᒫᓐᓇᐅᔪᖅ, ᑖᒃᑯᐊ NBDC-ᑯᑦ ᐊᐅᓚᑦᑎᔨᒃᑯᖏᑦ ᐊᓯᔾᔨᕐᓂᖃᑦᑎᓪᓗᒋᑦ, ᐅᐊᓇ ᓯᐸᐃᓄ ᑐᑭᒧᐊᑦᑎᒋᔭᐅᑲᐃᓐᓇᖅᑐᖅ ᐅᓂᒃᑳᑦᑕᖃᑦᑕᖅᑐᓂ ᑲᑎᒪᔨᓄᑦ. ᐊᐅᓚᑦᑎᖃᑦᑕᕐᒥᔪᖅᑕᐅᖅ ᐱᖁᑎᕐᔪᐊᓂᒃ ᐱᓕᕆᓂᖅ II ᐱᓕᕆᐊᒃᓴᒥᒃ ᐱᓕᕆᖃᑎᖃᑦᑐᓂ ᐱᓕᕆᔨᐅᔪᓂᒃ. ᐅᖃᑦᑐᓂ, “ᐅᕙᖓᓕ ᑕᑯᔪᒪᓗᐊᓐᖑᐊᖅᐊᕋ ᑲᔪᓯᓂᖃᑦᑎᐊᖅᑐᒥᒃ ᐋᖅᑭᒃᓯᒪᔪᖃᓪᓗᓂ ITC ᓄᓇᕗᑦᒥ ᐱᕕᖃᑦᑎᑦᑎᔪᒥᒃ ᓴᖅᑭᔮᖅᑎᑦᑎᔪᓐᓇᓂᕐᒥᒃ ᐊᒻᒪᓗ ᓄᑖᒥᒃ, ᑕᒪᓐᓇ ᐊᑐᖅᑕᐅᔪᓐᓇᕐᓗᓂ ᐱᕙᓪᓕᐊᓇᓱᐊᕐᓂᕐᒧᑦ (ᐃᒻᒥᒃᑯᑦ, ᐃᓅᓯᒃᑯᑦ, ᐃᓕᖅᑯᓯᒃᑯᑦ ᐅᕝᕙᓘᓐᓃᑦ ᑮᓇᐅᔭᓕᐅᕋᓱᐊᕐᓂᒃᑯᑦ), ᐊᒻᒪᓗ ᐱᕕᖃᑦᑎᑦᑎᓗᓂ ᓄᓇᕗᑦᒥᐅᑦ ᐊᔪᓐᖏᓐᓂᖃᓪᓗᑎᒃ ᐅᖃᖃᑎᒌᓐᓂᕐᒥᒃ ᐃᒻᒥᒧᑦ ᐊᒻᒪᓗ ᓄᓇᕐᔪᐊᕐᒥᐅᓄᑦ, ᓇᒻᒥᓂᖅ ᑐᓐᖓᕕᒻᒥᓂᒃ ᐊᑐᕐᓗᑎᒃ.”

ᐅᐊᓇ ᐱᓕᕆᖃᑎᖃᑉᐳᖅ ᐃᓚᒋᔭᐅᔪᓂᒃ, ᓇᒻᒥᓂᖃᑦᑎᐅᔪᓂᒃ ᐊᒻᒪᓗ ᐊᑦᔨᒌᖏᑦᑐᓂᒃ ᒐᕙᒪᐅᔪᓂᒃ ᑖᓐᓇ ᐱᖁᑎᕐᔪᐊᓕᕆᓂᖅ ᐱᓕᕆᐊᕐᖑᔪᖅ II ᑲᔪᓯᓂᖃᑦᑎᐊᕐᕋᓗᐊᕐᒪᖔᑦ ᓄᓇᕗᑦᒥᐅᑦ ᐃᓄᖁᑎᖏᑕ ᓂᕆᐅᒋᔭᖓᓂᒃ ᑕᒪᓐᓇ ᓴᖅᑭᑕᐅᕙᓪᓕᐊᑎᓪᓗᒍ ᐱᔨᑦᑎᕈᑦ. ᑖᓐᓇᑦᑕᐅᖅ ᐃᓚᒋᔭᐅᒋᕗᖅ ᐅᑭᐅᖅᑕᖅᑐᒥ ᐊᔪᕈᓐᓃᐸᓪᓕᐊᒐᓱᐊᕐᓂᕐᒧᑦ ᐱᕙᓪᓕᐊᓇᓱᐊᖅᑐᓂ ᐃᓚᒋᔭᐅᓪᓗᓂ.

ᐱᓕᕆᓴᐅᑲᐃᓐᓇᖅᑐᒧᑦ ᐃᑲᔪᖅᑐᑦ

ᑕᐃᕝ ᓯᒥᑦ, ᐃᑲᔪᖅᑎᓪᓗᐊᑕ – ᐋᑐᕚᒦᑦᑐᖅ, ᒥᔅᑕ ᓯᒥᑦ ᐸᕐᓈᖑᓇᓱᐊᖅᑐᓄᑦ ᑐᑭᒧᐊᑦᑎᑦᑎᔨᐅᖃᑦᑕᖅᑐᖅ ᑕᒪᒃᑯᓄᖓ ᐱᖁᑎᕐᔪᐊᓄᑦ II ᐱᓕᕆᐊᒃᓴᐅᑲᐃᓐᓇᖅᑐᓄᑦ, ᓂᐅᕕᐊᔅᓴᖃᑦᑎᐅᕙᑦᑐᓂᒃ ᐱᓕᕆᖃᑎᖃᕐᓂᕐᒧᑦ ᐊᒻᒪᓗ ᑳᑦᑐᓛᑎᒍᑦ ᐊᖏᖃᑎᒌᒍᑎᓂᒃ. 6-ᓯᓂᒃ ᐊᕐᕌᒍᓂᒃ ᐱᓕᕆᖃᑦᑕᖅᓯᒪᓂᖓ ᑖᒃᑯᓇᓂ NBDC-ᑯᓐᓂ ᐱᔭᕐᓂᑎᐊᖅᑐᒥᒃ ᐊᐅᓚᑦᑎᓂᒃᑯᑦ ᓅᑦᑎᐸᓪᓕᐊᓂᖃᑦᑐᖅ ᐃᓚᒋᔭᐅᖏᓐᓇᕐᓂᖓᒍᑦ.

ᕕᐊᓐᑎ ᑭᓕᓐᖑ, ᐱᓕᕆᔨᒻᒪᕇᑦ ᐱᓕᕆᐊᒃᓴᐅᑲᐃᓐᓇᖅᑐᒥᒃ ᐊᐅᓚᑦᑎᓂᖅ – ᐋᑐᕚᒦᑦᑐᖅ, ᒥᔅᑕ ᕕᓂᐅᑦ ᐃᑲᔪᖅᑐᐃᖃᑦᑕᖅᑐᖅ ᑐᓴᐅᒪᖃᑎᒌᓐᓂᕐᒥᒃ. ᐃᖃᓗᓐᓂᒥᐅᑕᐅᓚᐅᖅᑐᖅ ᐊᕐᕌᒎᓄᑦ ᑎᓴᒪᓄᑦ ᐃᖅᑲᓇᐃᔮᖃᑦᑐᓂ ᑐᓴᐅᒪᖃᑎᒌᓐᓂᕐᒧᑦ ᓇᓗᓇᐃᖅᑎᕆᓂᕐᒧᑦ ᐊᖓᔪᖅᑳᒻᒪᕆᒃ.

ᑕᐃᕕᑦ ᕕᓂᐅᑦ, ᑐᓴᐅᒪᖃᑎᒌᓐᓂᖅ – ᐋᑐᕚᒦᑦᑐᖅ, ᒥᔅᑕ ᕕᓄᐃᑦ ᐃᑲᔪᖅᑐᐃᑲᐃᓐᓇᖃᑦᑕᖅᑐᑦ ᐃᑲᔪᖅᑕᐅᔪᖃᕆᐊᖃᕋᐃᒻᒪᑦ ᐊᑦᔨᒌᖏᑦᑐᓂᒃ ᐱᓕᕆᐊᒃᓴᐅᔪᓂᒃ ᑐᕌᖓᔪᑦ ᑐᓴᐅᒪᖃᑦᑕᐅᑎᓕᕆᓂᕐᒧᑦ. ᐊᕐᕌᒍᓄᑦ ᑎᓴᒪᓄᑦ ᐃᖃᓗᓐᓂᒥᐅᑕᐅᓚᐅᖅᑐᖅ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐊᖓᔪᖅᑳᒻᒪᕆᐅᓚᐅᖅᑐᓂ.

ᐱᓕᕆᔩᑦ

ᐱᒋᐊᖅᑐᓂ ᒪᐃ 1, 2009, ᑎᐅᕈᓪ ᐅᕼᐅᒃᑲᓐᓄᐊᒃ ᐊᖓᔪᖅᑳᖑᓕᖅᑐᖅ ᑖᒃᑯᓄᖓ NBDC-ᑯᓐᓄᑦ, ᐊᒻᒪᓗᒃᑕᐅᖅ ᐃᒃᓯᕙᐅᑕᕆᔭᐅᓪᓗᓂ ᑲᑎᒪᔨᖏᓐᓄᑦ.

ᕌᐴᑦ ᒪᑲᓚᐃᓐ, ᑎᑎᕋᖅᑎ-ᑮᓇᐅᔭᓕᕆᔨᐅᔪᖅ, ᐃᒃᓯᕙᐅᑕᐅᑉ ᑐᖏᓕᕆᓪᓗᓂᐅᓪᓗ ᑲᑎᒪᔨᖏᑕ.

ᑕᒪᒃᑮᒃ ᐱᓕᕆᔨᓄᑦ ᐃᓂᐅᔫᒃ ᐃᓐᓄᒃᑕᐅᓯᒪᑲᐃᓐᓇᖅᑑᒃ ᑖᒃᑯᓇᓐᖓᑦ ᐊᑭᓕᖅᓱᑕᐅᖏᑦᑐᑎᒃ ᑲᑎᒪᔨᐅᔪᓂᑦ ᑎᑭᓪᓗᒍ ᑕᐃᒃᑯᖓ NBDC-ᑯᑦ ᐃᖅᑲᓇᐃᔭᖅᑎᑖᖅᐸᑕ ᑮᓇᐅᔭᖁᑎᓪᓗᐊᑕᖏᑦ ᐊᑐᐃᓐᓇᐅᓕᖅᐸᑕ.

ᑲᑎᒪᔩᑦ

ᑲᑎᒪᔩᑦ ᑭᒡᒐᖅᑐᐃᒻᒪᑕ ᓄᓇᓕᓕᒫᖏᓐᓂᒃ ᓄᓇᕗᑦ, ᐊᒻᒪᓗ ᐱᖃᑕᐅᓪᓗᑎᒃ ᐃᓚᒋᔭᐅᔪᑦ ᑕᒪᒃᑮᓐᓂᒃ ᐊᖏᔫᑎᓂᒃ ᒥᑭᑦᑑᓂᓪᓗ ᓄᓇᓕᐅᔪᓂᒃ ᓄᓇᕗᑦᒥ. ᑲᑎᑦᑐᒋᑦ 7-ᐸᖑᔪᑦ ᑲᑎᒪᔨᓄᑦ ᐃᓂᐅᔪᑦ ᑖᒃᑯᓇᓐᖓᑦ “ᐃᒻᒥᒃᑯᑦ” ᑲᑎᒪᔨᐅᓂᕐᒧᑦ, ᐊᒻᒪᓗ ᒪᕐᕉᒃ ᐃᓂᐅᔪᒃ ᑎᒃᑯᐊᖅᑕᐅᖃᑦᑕᖅᑐᑦ “ᒐᕙᒪᒃᑯᓐᓂᑦ” ᑲᑎᒪᔨᐅᓂᕐᒧᑦ, ᑲᑎᑦᑐᒋᑦ 9-ᖑᓪᓗᑎᒃ ᑲᑎᒪᔩᑦ.

2010 ᑲᑎᒪᓂᕐᔪᐊᖃᑦᑎᓪᓗᒋᑦ ᐊᕐᕌᒍᑕᒫᖅᓯᐅᑎᒥᒃ, ᐱᖓᓱᑦ ᑲᑎᒪᔩᒃ ᓂᕈᐊᖅᑕᐅᓚᐅᖅᑐᖅ ᑖᒃᑯᓇᓐᖓᑦ NBDC-ᑯᓐᓂᑦ “ᐃᒻᒥᒃᑯᑦ” ᑲᑎᒪᔨᐅᓂᕐᒧᑦ ᐊᕐᕌᒍᓄᑦ ᐱᖓᓱᓄᒃ ᑲᑎᒪᔨᐅᓂᐊᕐᓗᑎᒃ. ᑖᒃᑯᐊᖑᕗᑦ ᑎᐅᕈ ᐅᕼᐅᒃᑲᓐᓄᐊ ᐃᖃᓗᒃᑑᑦᑎᐊᕐᒥᐅᖅ (ᐅᑎᖅᑐᖅ), ᐹᕐ ᒪᑲᓚᐃᓐ ᓴᓂᑭᓗᐊᕐᒥᐅᖅ (ᐅᑎᖅᑐᖅ) ᐊᒻᒪᓗ ᒪᐃᒃ ᐱᐅᕆ ᑭᓐᖓᕐᒥᐅᖅ (ᐅᑎᕐᒥᔪᖅᑕᐅᖅ).

ᑭᓐᔨ ᓲ, ᖃᒪᓂᖅᑐᐊᕐᒥᐅᑕᒥᓂᒃ ᐊᒻᒪᓗ ᓅᕋᑖᕐᓂᑯ ᐃᖃᓗᓐᓄᑦ, ᒪᕐᕉᓐᓄᑦ ᐊᕐᕌᒎᓐᓄᑦ ᑲᑎᒪᔨᐅᓂᕐᒥᓄᑦ ᓄᖅᑲᓚᐅᖅᑐᖅ, ᑖᒃᑯᐊ NBDC-ᑯᑦ ᑎᒥᐅᔫᑉ ᒪᓕᒐᖏᑦ ᒪᕐᕉᒋᐊᖃᑦᑎᑎᖏᒻᒪᑕ ᑲᑎᒪᔩᓐᓂᒃ ᑕᕝᕙᖓᑦᓴᐃᓐᓴᖅ

ᓄᓇᓕᓐᓂᑦ. ᒪᕐᕉᓐᓂᓪᓕ ᑲᑎᒪᔨᑕᖃᕇᒻᒪᑦ ᐃᖃᓗᓐᓂ.

ᐱᕙᓪᓕᐊᔪᓕᕆᔨᒃᑯᑦ ᐊᒻᒪᓗ ᐃᖏᕐᕋᖃᑦᑕᖅᑐᓕᕆᔨᒃᑯᑦ ᑎᒃᑭᐊᖅᓯᖃᑦᑕᖅᐳᑦ ᐊᑕᐅᓯᕐᒥᒃ ᑲᑎᒪᔨᒃᓴᒥᒃ ᑕᕝᕙᓐᖓᑦ “ᒐᕙᒪᒃᑯᓐᓂᑦ) ᑲᑎᒪᔨᐅᓂᐊᖅᑐᒥᒃ. ᓄᓇᕗᑦ ᑐᓐᖓᕕᒃᑯᑦ ᑎᒃᑯᐊᖅᓯᖃᑦᑕᖅᐳᑦ ᐊᑕᐅᓯᕐᒥᒃ “ᒐᕙᒪᒃᑯᑎᒎᖏᑦᑐᖅ” ᑲᑎᒪᔨᐅᖃᑕᐅᓂᐊᖅᑐᒥᒃ.

ᒥᔅᑕ ᑎᐅᕈ ᐅᕼᐅᒃᑲᓐᓄᐊ ᑲᔪᓯᓂᐊᖅᐳᖅ ᐃᒃᓯᕙᐅᑕᕆᔭᐅᓗᓂ ᑖᒃᑯᓄᖓ NBDC-ᑯᓐᓄᑦ, ᑖᓐᓇᓗ ᕌᐴᑦ ᒪᑲᓚᐃᓐ ᑲᔪᓯᓂᐊᕐᕆᓪᓗᓂ ᑐᖏᓕᕆᓗᓂᐅᒃ ᐃᒃᓯᕙᐅᑕᐅᑉ.

ᑲᑎᒪᔩᑦ ᐅᑯᐊᖑᕗᑦ, ᐃᑲᔪᖅᑎᐅᓂᐊᖅᑐᑦ ᐊᑭᓕᖅᓱᖅᑕᐅᖏᓪᓗᑎᒃ ᑐᑭᒧᐊᑦᑎᑦᑎᔨᐅᓗᑎᒃ ᑖᒃᑯᓂᖓ ᓄᓇᕗᑦ ᖃᕋᓴᐅᔭᓕᕆᓂᕐᒥᒃ ᐱᕙᓪᓕᐊᑎᑦᑎᓂᕐᒧᑦ ᑯᐊᐳᕋᐃᓴᓐ:

ᐋᑕᒥ ᐃᑦᑐᐊᓯᐊᖅ, (ᐃᖃᓗᐃᑦ)
ᐹᑉ ᒪᑲᓚᐃᓐ, (ᓴᓂᑭᓗᐊᖅ)
ᑎᐊᕈᓪ ᐅHᐅᒃᑲᓐᓄᐊᒃ, (ᐃᖃᓗᒃᑑᑦᑎᐊᖅ)
ᒪᐃᒃ ᐱᐅᕆ, (ᑭᓐᖓᐃᑦ)
ᒧᐊᕆ ᓯᓇᐃᑐᒫᓐ, (ᐃᖃᓗᐃᑦ)
ᓯᐅᕋ ᒦᑯ, (ᓴᓂᑭᓗᐊᖅ)
ᐃᓐᓄᒃᓯᒪᖏᑦᑐᖅ, ᒫᓐᓇᐅᔪᒃ ᐃᓐᓄᒃᑕᐅᓇᓱᐊᖅᑐᖅ (ᑭᕙᓪᓕᕐᒥᑦ)
ᕋᐃᐊᓐ ᐋᓕᕗ, EDT ᑎᒃᑯᐊᖅᑕᐅᓯᒪᔪᖅ (ᐸᖕᓂᖅᑑᒥᑦ)
ᕗᕌᓐᑯ ᐸᓯᒥ, ᓄᓇᕗᑦ ᑐᓐᖓᕕᒃᑯᑦ ᑎᒃᑯᐊᖅᓯᒪᔭᖓᑦ (ᐃᖃᓗᐃᑦ)

ᐋᑕᒥ ᐃᑦᑐᐊᓯᐊᖅ, (ᐃᖃᓗᐃᑦ)
ᒥᔅᑕ ᐃᑦᑐᐊᓯᐊᖅ ᑲᑎᒪᔨᖏᓐᓃᓯᒪᓕᖅᑐᖅ NBDC-ᑯᑦ ᑕᐃᒪᓐᖓᓂᒃ ᐱᒋᐊᓚᐅᖅᓯᒪᒻᒪᑕ. ᑕᑯᔪᒪᑦᑎᐊᖅᑐᓂᓗ NBDC-ᑯᓐᓂᑦ ᑲᔪᓯᓗᑎᒃ ᐱᓕᕆᐊᕐᒥᓂᒃ ᐱᕙᓪᓕᐊᓂᖓᓄᑦ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕈᑎᓂᒃ ᐊᑐᖅᑕᐅᔭᕆᐊᓕᓐᓂᒃ ᐱᕙᓪᓕᐊᑐᐃᓐᓇᑎᓪᓗᒍ ᐱᔪᒫᕆᔭᐅᔪᑦ ᓄᓇᕗᒻᒥᐅᑕᓄᑦ. ᑕᑯᓐᓈᖅᑐᖅ NBDC-ᑯᑦ ᐱᒻᒪᕆᐅᒋᐊᖏᓐᓂᒃ ᖃᐅᔨᓴᕐᓂᒃᑯᑦ ᐊᒻᒪᓗ ᐱᕙᓪᓕᐊᓂᖓᒍᑦ ᖃᖓᑦᑕᖅᑎᑕᐅᓯᒪᔪᒃᑯᑦ ᐊᑐᖅᑕᐅᕙᑦᑐᓂᒃ ᐃᓄᐃᑦ ᓄᓇᕗᑦᒥ ᐃᑲᔪᖅᑕᐅᔪᓐᓇᖁᓪᓗᒋᑦ ᖃᕋᓴᐅᔭᓕᕆᓂᒃᑯᑦ. ᐊᓐᖑᑎᓯᒪᐃᓐᓇᕈᒪᓪᓗᓂ ᑐᓴᐅᒪᖃᑎᒌᓂᕐᒧᑦ ᓄᑖᓐᖑᖅᐸᓪᓕᐊᔪᑎᒍᑦ ᓄᓇᕐᔪᐊᒥ, ᐊᒻᒪᓗ ᓄᓇᕗᑦ ᐊᑐᕈᓐᓇᖁᓪᓗᒍ ᑖᒃᑯᓂᖓ ᓄᑖᓂᒃ ᓄᑖᓐᖑᖅᐸᓪᓕᐊᔪᓂᒃ. ᐃᓚᖓ ᐱᓪᓗᐊᑕᐅᔪᖅ ᒥᔅᑕ ᐃᑦᑐᐊᓯᐊᕐᒧᑦ ᑖᒃᑯᐊ NBDC-ᑯᑦ ᐋᖅᑭᒃᓯᒪᑦᑎᐊᑐᒃᑯᑦ ᑮᓇᐅᔭᖅᑖᕈᓐᓇᕐᓗᑎᒃ ᐱᓕᕆᐊᕐᕆᕙᑦᑕᖏᓐᓄᑦ ᓄᓇᕗᒻᒥᐅᑕᓄᑦ. ᑕᑯᔪᒪᓪᓗᓂᓗ ᐋᖅᑭᐸᓪᓕᐊᖏᓐᓇᕐᓂᖏᓐᓂᒃ ᐱᔨᑦᑎᕈᑎᑦ ᓄᓇᖃᑦᑎᐅᔪᓄᑦ, ᐊᒻᒪᓗ ᐱᒻᒪᕆᐅᒋᓪᓗᒍ ᐱᓕᕆᐊᕐᕆᔭᖓ NBDC-ᑯᓐᓄᑦ ᓄᓇᖃᑦᑎᐅᔪᑦ ᐊᖅᑯᑎᖃᕈᓐᓇᕐᓗᑎᒃ ᐱᓕᒻᒪᔅᓴᐃᓂᕐᒧᑦ ᖃᓄᖅ ᐊᑐᕈᓐᓇᕐᒪᖔᕐᒥᒃ ᓱᒃᑲᔪᒃᑯᑦ ᖃᕆᑕᐅᔭᓕᕆᔾᔪᑎᓂᒃ ᓇᒻᒥᓂᕐᒧᑦ ᐊᑑᖃᓐᓂᐊᖅᑐᓂᒃ. 1990-ᖏᓐᓂ, ᒥᔅᑕ ᐃᑦᑐᐊᓯᐊᖅ ᐱᓕᕆᖃᑎᖃᓚᐅᖅᑐᖅ Microcell-ᑯᓐᓂᑦ ᐊᒻᒪᓗ ᐃᓚᒋᔭᐅᓚᐅᖅᑐᓂ ᐱᒋᐊᖅᑎᑦᑎᖃᑕᐅᓪᓗᓂ ᐃᓄᒃᓱᒃ ᖃᕋᓴᐅᔭᒃᑯᑦ ᐱᓕᕆᖃᑎᒌᓐᓂᕐᒥᒃ - ᑲᑉᐸᓂᐅᔪᖅ ᐱᒋᐊᖅᑎᑦᑎᓚᐅᖅᑐᖅ ᐅᓪᓗᒥᐅᔪᖅ ᐅᐊᔭᒨᖏᑦᑐᖅ ᖃᕋᓴᐅᔭᓕᕆᔾᔪᑎᒥᒃ ᐋᖅᑭᒃᑕᐅᓯᒪᔪᖅ ᑕᕝᕙᓂ ᕿᓂᖅ ᖃᕋᓴᐅᔭᓕᕆᔾᔪᑎᒥ. ᒥᔅᑕ ᐃᑦᑐᐊᓯᐊᖅ ᐱᒋᐊᓚᐅᖅᑐᖅ ᐃᖅᑲᓇᐃᔮᒥᒃ ᐅᖄᓚᐅᓯᕆᔨᒃᑯᓐᓂ Bell Canada 1980-ᖏᑦ ᐱᒋᐊᓕᕋᑖᖅᑎᓪᓗᒋᑦ ᐊᒻᒪᓗ ᐱᖃᑕᐅᖏᓐᓇᖅᓯᒪᔪᖅ ᑕᐃᒪᓐᖓᓂᒃ ᓇᐅᒃᑯᓕᒫᖅ ᑐᓴᐅᒪᖃᑦᑕᐅᑎᓕᕆᓂᒃᑯᑦ. ᓇᒻᒥᓂᖃᑦᑎᐅᓯᒪᒻᒥᔪᖅ ᐊᒻᒪᓗ ᐊᖓᔪᖅᑳᖑᓪᓗᓂ ᓄᓇᓂᐊᑦᑯᓐᓄᑦ, ᓄᓇᓕᓐᓂ ISP ᐃᖃᓗᓐᓂ ᐊᕐᕌᒍᓄᑦ 11-ᐸᓄᑦ. ᐱᓕᕆᖃᑕᐅᓚᐅᕐᒥᔪᖅ ᑲᓇᑕᒥ ᓱᒃᑲᔪᒃᑯᑦ ᖃᕆᑕᐅᔭᓕᕆᓂᕐᒧᑦ ᐱᓕᕆᔨᐅᑲᐃᓐᓇᖅᑐᓂ 2001-ᒥ, ᐊᒻᒪᓗ ᓂᕈᐊᖅᑕᐅᓚᐅᖅᑐᓂ ᑖᒃᑯᓄᖓ NBDC ᑲᑎᒪᔨᖏᓐᓄᑦ 2003-ᒥ, ᑕᐃᒪᓐᖓᓂᓪᓗ ᐱᔨᑦᑐᖅᑐᓂ. ᒥᔅᑕ ᐃᑦᑐᐊᓯᐊᖅ ᐃᓅᓯᓕᒫᖅ ᓄᓇᖃᑦᑎᐅᔪᖅ ᕿᑭᖅᑖᓗᒻᒥ.

ᐹᑉ ᒪᑲᓚᐃᓐ, (ᓴᓂᑭᓗᐊᖅ)
ᒥᔅᑕ ᒪᑲᓚᐃᓐ ᐱᓕᕆᖃᑕᐅᑦᑎᐊᕐᓚᐅᖅᑐᖅ ᓯᕗᓪᓕᐅᓚᐅᖅᑐᓄᑦ NBDC ᑲᑎᒪᔨᖏᓐᓄᑦ, ᐊᒻᒪᓗ ᓯᕗᓂᐊᒍᑦᑕᐅᖅ, ᐱᔨᑦᑎᓚᐅᖅᑐᓂ ᑕᕝᕙᓂ NBDC ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᓐᓂ. ᐊᖓᔪᖅᑳᖑᔪᖅ ᓴᓂᑭᓗᐊᒥ ᐃᓄᓐᓄᑦ ᓇᒻᒥᓂᕆᔭᐅᔪᒥ ᑲᑉᐸᓂᐅᔪᖅ ᓄᓇᓕᓐᓂ ᖃᖓᑦᑕᖅᑎᑕᐅᓯᒪᔪᒃᑯᑦ ᖃᕋᓴᐅᔭᒃᑰᕈᓐᓇᐅᑎᖃᑦᑎᑦᑎᓯᒪᔪᑦ 1998-ᒥᓂᒃ ᐊᒻᒪᓗ ᓄᓇᓕᓐᓂ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕋᖅᑎᐅᓪᓗᓂ ᑖᒃᓱᒧᖓ ᓄᑖᒧᑦ ᐊᑐᖅᑐᑎᒃ ᕿᓂᖅ ᖃᕋᓴᐅᔭᓕᕆᔾᔪᑎ ᓴᓂᑭᓗᐊᕐᒥ. ᑭᒡᒐᖅᑐᐃᖃᑦᑕᖅᓯᒪᓪᓗᓂᓗ ᓲᕐᓗ “ᓂᓪᓕᐊᔨᐅᓪᓗᓂ ᑭᒡᒐᑐᖅᑐᓂ ᒥᑭᑦᑐᓂᒃ ᑮᓇᐅᔭᓕᐅᕋᓱᐊᖅᕕᐅᔪᓂᒃ ᓄᓇᓕᓐᓃᖔᖅᑐᓂᒃ ᒥᑭᑦᑐᓂᒃ” ᑲᑎᒪᔨᓂ, ᐊᒻᒪᓗ ᐱᕚᓪᓕᑎᑦᑎᓯᒪᓪᓗᓂᓗ ᐊᑦᔨᒌᖏᑦᑐᓄᑦ ᐱᒻᒪᕆᐅᔪᓄᑦ ᐱᑦᔪᑎᐅᔪᓂᒃ NBDC ᑲᑎᒪᓂᖃᑦᑎᓪᓗᒋᑦ ᐱᑦᔪᑎᖃᑦᑐᑎᒃ ᐊᑲᐅᖏᓕᐅᕈᑎᓄᑦ ᓄᓇᖃᑦᑐᓂ ᒥᑭᑦᑐᒥ, ᐅᖓᓯᑦᑐᒥ ᐅᑭᐅᖅᑕᖅᑑᑉ ᓄᓇᓕᐊᓂ ᐊᒻᒪᓗ ᐱᓕᕆᓪᓗᓂ ᖃᕋᓴᐅᔭᒃᑯᑦ ᑕᑯᒋᐊᖅᕕᖓᑎᒍᑦ ᓂᐅᕕᖅᕕᒃᑯᑦ ᓂᐅᕕᐊᒃᓴᖃᕐᓂᕐᒧᑦ ᓄᓇᓕᓐᓂ ᓴᓇᔭᐅᓯᒪᔪᓂᒃ, ᓄᓇᕐᔪᐊᕐᒥ ᐱᔭᐅᓂᖅᐹᓂᒃ, ᓴᓇᐅᒐᕐᓂᒃ ᓴᓇᓐᖑᐊᒐᕐᓂᒃ. ᒥᔅᑕ ᒪᑲᓚᐃᓐ ᑲᔪᓯᔪᒪᓪᓗᓂ ᐃᓚᒋᔭᐅᓗᓂ ᑲᑎᒪᔨᖏᓐᓄᑦ ᑖᒃᑯᓄᖓ ᓄᓇᕗᑦᒥ ᓱᒃᑲᔪᒃᑯᑦ ᖃᕆᓴᐅᔭᓕᕆᓂᕐᒧᑦ ᐱᕙᓪᓕᐊᔪᓕᕆᔨᒃᑯᑦ ᑯᐊᐳᕇᓴᓐᑯᖏᓐᓄᑦ ᐱᔪᓐᓇᕐᓂᕆᔭᓂ ᐊᑐᖅᑕᐅᔪᓐᓇᖁᓪᓗᓂᐅᒃ ᐱᓕᕆᐊᖃᓪᓗᓂ ᖃᕆᓴᐅᔭᓂᒃ ᐊᒻᒪᓗ ᐊᑐᕐᓗᓂ ᑕᑯᒋᐊᖅᕕᖓᓂᒃ ᖃᕋᓴᐅᔭᐅᑉ. ᐅᖃᑦᑐᓂᓗ ᑕᑯᖃᑦᑕᖅᓯᒪᒐᒥ ᐃᓄᑦᑎᐊᕚᓗᓐᓂᒃ ᐅᑭᐅᑦᑕᖅᑐᒥ ᐊᒻᒪᓗ ᐊᓕᐊᓇᐃᒍᓱᖃᑦᑕᖅᓯᒪᓪᓗᓂ ᖃᐅᔨᕙᓪᓕᐊᓪᓗᓂᒋᑦ.

ᑎᐅᕈᓪ ᐅHᐅᒃᑲᓐᓄᐊᒃ, (ᐃᖃᓗᒃᑑᑦᑎᐊᖅ) ᐃᒃᓯᕙᐅᑕᖓ NBDC-ᑯᑦ
ᒥᔅᑕ ᐅᕼᐅᒃᑲᓐᓄᐊᒃ ᓯᕗᓪᓕᖅᐹᒥ ᓂᕈᐊᖅᑕᐅᓚᐅᖅᑐᖅ ᐃᒃᓯᕙᐅᑕᖓᓄᑦ NBDC-ᑯᑦ 2005-ᒥ ᑖᒃᑯᓇᓐᖓᑦ NBDC-ᑯᑦ ᑲᑎᒪᔨᖏᓐᓂᑦ. ᐊᖓᔪᖅᑳᕆᔭᐅᔪᓪᓗᓂ Polarnet-ᑯᓐᓂᑦ, ᒥᔅᑕ ᐅᕼᐅᒃᑲᓐᓄᐊᒃ ᒫᓐᓇᐅᔪᖅ ᑲᒪᒋᔭᖃᑦᑐᖅ ᐊᑐᓕᖅᑕᐅᓂᖓᓄᑦ ᕿᓂᖅ ᐃᓘᓇᖏᓐᓂ ᓄᓇᓕᖏᓐᓂ ᕿᑎᕐᒥᐅᑦ, Polarnet-ᒥᑦ ᓄᓇᓕᓐᓂ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕋᖅᑎᐅᓪᓗᓂ, ᑳᑦᑐᓛᒃᑕᐅᓯᒪᔪᖅ ᑖᒃᑯᓇᓐᖓᑦ SSI Micro (ᑲᑉᐸᓂᐅᔪᖅ ᓴᓇᓚᐅᖅᑐᖅ ᓄᑖᒥᒃ ᕿᓂᖅ ᓱᒃᑲᔪᒃᑯᑦ ᖃᕋᓴᐅᔭᓕᕆᔾᔪᑎ) ᐱᓕᒻᒪᔅᓴᐃᓂᖃᖃᑦᑕᕐᓗᑎᒃ ᐃᓘᓇᖏᓐᓄᑦ ᓄᓇᓕᓐᓂ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕋᖅᑎᓂᒃ ᓄᓇᓕᓕᒫᓂ. ᒥᔅᑕ ᐅᕼᐅᒃᑲᓐᓄᐊᒃ ᐃᓚᒋᔭᓪᓗᐊᑕᐅᓚᐅᖅᑐᖅ ᐃᓄᓐᓄᑦ ᐱᒋᐊᖅᑎᑦᑎᓚᐅᖅᑐᓄᑦ Polarnet-ᒥᒃ 1997-ᐸᒥ - ᓄᓇᓕᓐᓂ ᖃᖓᑦᑕᖅᑎᑕᐅᓯᒪᔪᒃᑯᑦ ᖃᕋᓴᐅᔭᒃᑰᕈᓐᓇᐅᑎᖃᑦᑎᑦᑎᓯᒪᔪᑦ ᑕᓪᓕᒪᓄᑦ ᕿᑎᕐᒥᐅᑦ ᓄᓇᓕᖏᓐᓄᑦ. ᐅᓪᓗᒥ, ᑕᑯᔪᒪᔪᖅ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᓄᑖᓐᖑᖅᐸᓪᓕᐊᔪᑦ ᐊᑐᐃᓐᓇᐅᓗᑎᒃ ᓄᓇᕗᑦᒥ ᐊᑦᔨᖓᑎᑐᑦ ᓄᑖᓐᖑᖅᐸᓪᓕᐊᔪᑦ ᖃᓪᓗᓈᓂ. ᐊᖏᔪᒻᒪᕆᐊᓗᒻᒥᒃ ᑕᑯᓐᓈᖅᑐᖅ ᐃᑲᔪᕈᓐᓇᕐᓗᓂ ᓄᓇᕗᒻᒥᐅᓂᒃ ᐋᖅᑭᐹᓪᓕᖅᑎᕆᓂᕐᒧᑦ ᑐᓴᐅᒪᖃᑦᑕᐅᑎᓕᕆᓂᕐᒥᒃ - ᐱᖃᓯᐅᑎᓪᓗᒍ VoIP, ᑕᓚᕖᓴᒃᑯᑦ ᑲᑎᒪᖃᑦᑕᕐᓂᖅ, ᐊᒻᒪᓗ ᐊᑦᔨᒌᖏᑦᑐᑎᒍᑦ ᐱᓪᓚᑦᑖᒃᑯᑦ ᑐᓴᐅᒪᖃᑦᑕᐅᑎᓂᕐᒥᒃ. ᐃᓅᓯᓕᒫᖅ ᓄᓇᖃᑦᑎᐅᔪᖅ ᐃᖃᓗᒃᑑᑦᑎᐊᕐᒥ, ᖃᐅᔨᒪᑦᑎᐊᖅᑐᑦ ᐱᓕᕆᐊᖃᕐᓂᒃᑯᑦ ᐊᑦᔨᒌᖏᑦᑐᓂᒃ ᑲᑎᒪᔨᐅᔪᓂ ᑲᑐᔾᔨᖃᑎᒌᓄᑦ. ᑲᑎᒪᔨᐅᖃᑕᐅᓯᒪᔪᖅ ᓄᓇᕗᑦᒥ ᐸᐸᑦᑎᔨᒃᑯᓐᓄᑦ, ᐊᒻᒪᓗ ᑲᑎᒪᔨᐅᓯᒪᒻᒥᔪᖅ ᓄᓇᕗᑦᒥ ᐃᒥᐊᓗᓕᕆᓂᕐᒧᑦ ᑲᑎᒪᔨᖏᓐᓄᑦ. ᐃᑲᔪᖅᑎᐅᖃᑦᑕᖅᑐᑦ ᐃᖃᓗᒃᑑᑦᑎᐊᑉ ᒪᓕᒐᓕᕆᔨᒃᑯᑦ ᑲᑎᒪᔨᕋᓛᖏᓐᓂ, ᐊᒻᒪᓗ ᓄᓇᓕᓐᓂ ᐅᓇᓕᒃᓴᕋᓛᓂᒃ ᑲᒪᖃᑦᑕᖅᑐᓂ. ᒥᔅᑕ ᐅᕼᐅᒃᑲᓐᓄᐊᒃ ᐋᖏᖃᑎᒌᑦᑎᑦᑎᓇᓱᓚᐅᖅᑐᖅ ᑖᒃᓱᒥᖓ Polarnet-ᒥᒃ ᐊᖅᑯᑎᐅᖁᓪᓗᓂᐅᒃ Globalstar ᓂᐅᕕᐊᒃᓴᖃᑦᑎᐅᓪᓗᓂ ᖃᖓᑦᑕᖅᑎᑕᐅᓯᒪᔪᒃᑯᑦ ᐅᖄᓚᐅᑎᓂᒃ. ᐊᒻᒪᓗᒃᑕᐅᖅ ᓴᓇᔪᓕᕆᓂᕐᒧᑦ ᐊᔪᓐᖏᒻᒪᕆᑦᑎᓪᓗᒍ, ᐃᓄᓐᓂᒃᑕᐅᖅ ᐱᓕᕆᖃᑎᖃᕈᓐᓇᑎᐊᕐᒥᔪᖅ.

ᒪᐃᒃ ᐱᐅᕆ, (ᑭᓐᖓᐃᑦ)
ᒥᔅᑕ ᐱᐅᕆ ᓄᓇᓕᓐᓂ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕋᖅᑎᖓ ᑖᒃᑯᐊ ᓄᑖᖑᔪᖅ ᕿᓂᖅ ᖃᕋᓴᐅᔭᓕᕆᔾᔪᑎ, ᐱᑕᖃᑦᑎᑦᑎᕙᑦᑐᓂᒃ ᐱᔨᑦᑎᕋᐅᑎᓂᒃ ᓄᓇᖃᑦᑎᐅᔪᓄᑦ ᑭᓐᖓᕐᓂ. ᑕᑯᔪᒪᔪᖅᑕᐅᖅ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕋᐅᑎᑦ ᐊᖏᓪᓕᒋᐊᖅᑕᐅᓗᑎᒃ ᐊᒥᓱᓄᑦ ᐃᓄᓐᓄᑦ ᐊᔪᓐᓇᖏᑉᐸᑦ, ᐊᒻᒪᓗ ᐃᓄᐃᑦ ᐃᑲᔪᖅᑕᐅᖃᑦᑕᕐᓗᑎᒃ ᐃᑲᔪᖅᑕᐅᔭᕆᐊᖃᕐᓂᖏᑦ ᒪᓕᓪᓗᒋᑦ ᐊᑐᖅᑕᐅᑎᐊᕐᓗᓂ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᖅ. ᓱᒃᑲᔪᒥᒃ ᖃᕋᓴᐅᔭᓕᕆᔾᔪᑎᖃᑉᐸᑕ, ᓄᓇᕗᑦᒥᐅᑦ ᓇᓗᓇᐃᖅᓯᔪᓐᓇᕋᔭᖅᑐᑦ ᓄᑖᒥᒃ ᓄᓇᕗᑦᒥᒃ - ᐊᒥᓱᑦ ᐃᓄᐃᑦ ᑐᓴᐅᒪᖃᑎᒌᑦᑎᐊᓂᖅᓴᐅᔪᓐᓇᕋᔭᕐᒪᑕ ᓄᓇᕗᑎᒍᑦ. ᖃᐅᔨᓴᖃᑦᑕᖅᓯᒪᔪᖅ ᐃᓄᓐᓂᒃ ᖃᕋᓴᐅᔭᒃᑰᕋᓱᐊᖅᑐᓂᒃ ᓯᕗᓪᓕᖅᐸᒥ, ᐊᒻᒪᓗ ᐱᓪᓗᐊᑕᖃᓕᕐᓂᕆᔭᖏᓐᓄᑦ ᐊᑐᕐᓗᓂ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒥᒃ ᐅᖃᓪᓚᖃᑎᖃᓪᓗᓂ ᐊᓯᒥᓄᑦ. ᑕᐃᒪᓕ ᐊᕐᕌᒎᓂᐊᖅᑐᒥ, ᒥᔅᑕ ᐱᐅᕆ ᑕᑯᔪᒪᒐᓗᐊᖅᐳᖅ ᑲᒪᒋᔭᐅᓂᖅᓴᐅᓕᕐᓗᓂ ᓱᒃᑲᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐊᑐᖅᑕᐅᓇᓱᐊᖅᑐ ᑐᓴᐅᒪᖃᑎᒌᓐᓂᖅ ᐊᓯᒥᒃ ᐱᔭᕆᐊᑭᓐᓂᖅᓴᐅᓂᐊᕐᒪᑦ ᐊᒻᒪᓗ ᐊᑐᕋᔅᓴᑦᑎᐊᕙᐅᓂᖅᓴᐅᓕᕐᓗᓂ. ᒥᔅᑕ ᐱᐅᕆ ᒫᓐᓇᐅᔪᖅ ᐱᓕᕆᔪᖅ ᕼᐋᒻᓚᒃᑯᓐᓂ ᐱᖁᑎᓂᒃ ᖃᐅᔨᓴᐃᓂᕐᒧᑦ ᐊᖓᔪᖅᑳᖑᓪᓗᓂ, ᐊᒻᒪᓗ ᐊᐅᓚᑦᑎᖃᑦᑕᖅᑐᖅ ᓄᓇᓕᓐᓂ ᑲᐃᐳᓕᕆᓂᕐᒥᒃ. ᐊᑯᓂᐊᓗᒃ ᓄᓇᕗᑦᒥᐅᑕᐅᓕᖅᑐᖅ, ᓅᒋᐊᖓᓚᐅᖅᓯᒪᔪᖅ ᐃᖃᓗᓐᓄᑦ 1978-ᒥ ᐊᒻᒪᓗ ᓅᓚᐅᖅᓯᒪᓪᓗᓂ ᑭᓐᖓᕐᓄᑦ ᐱᓕᕆᔭᖅᑕᖅᑐᓂ ᑯᐊᐸᒃᑯᖏᓐᓄᑦ 1983-ᖑᑎᓪᓗᒍ. ᐱᓕᕆᓕᓚᐅᕆᓪᓗᓂ ᓴᓇᔪᓕᕆᔨᒃᑯᖏᓐᓄᑦ ᒐᕙᒪᒃᑯᑦ ᓄᓇᑦᑎᐊᕐᒥ, ᐊᒻᒪᓗ ᒫᓐᓇᐅᔪᖅ ᐃᖅᑲᓇᐃᔭᖅᑐᖅ ᕼᐋᒻᒪᒃᑯᓐᓄᑦ.

ᒧᐊᕆ ᓯᓇᐃᑐᒫᓐ, (ᐃᖃᓗᐃᑦ)
ᒥᔅᑕ ᓯᓇᐃᑐᒫᓐ ᐊᕐᕌᒍᓄᑦ 30 ᐅᖓᑖᓄᑦ ᐱᓕᕆᓂᖃᖅᓯᒪᔪᖅ ᓯᕗᓕᖅᑎᒋᔭᐅᓪᓗᓂ ᐊᐅᓚᓂᕆᔭᐅᔪᓂ, ᐱᔨᑦᑎᖅᑕᐅᔪᓂᓪᓗ ᐱᓕᕆᖃᑎᖃᑦᑎᐊᓂᕐᒧᑦ ᐊᒻᒪᓗ ᐱᓕᕆᕝᕕᐅᔪᒥᓗ ᐱᓕᕆᐊᔅᓴᐅᔪᓂᒃ ᑲᔪᓯᑎᑦᑎᓇᓱᐊᕐᓂᕐᒧᑦ, ᑕᒪᕐᒥᐸᓗᒃ ᑕᒪᒃᑯᐊ ᐊᑐᕆᐊᖃᖅᓯᒪᕗᑦ ᖃᕋᓴᐅᔭᓂᒃ ᐊᒻᒪᓗ ᑐᓴᐅᑎᓂᒃ. ᑕᑯᓐᓈᖅᑐᖅ ᓱᒃᑲᔪᒃᑯᑦ ᖃᕆᑕᐅᔭᓕᕆᓂᕐᒧᑦ ᑐᑭᓯᒋᐊᖅᕕᒃ ᐱᒻᒪᕆᐅᒋᐊᖓᓂᒃ ᐱᖁᑎᕐᔪᐊᖅ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᒻᒪᓗ ᓄᓇᓕᓐᓂ ᐱᕙᓪᓕᐊᓂᖓᓄᑦ ᓄᓇᕗᑦ. ᖃᐅᔨᓴᖃᑦᑕᖅᓯᒪᓂᖓᓄᑦ ᐅᑉᐱᕈᓱᓪᓚᑖᖅᑐᖅ ᓄᓇᕗᑦ ᓯᕗᓂᒃᓴᖓᓂ ᑲᔪᓯᑦᑎᐊᕐᓂᖅ ᐊᑐᕆᐊᖃᕐᓂᐊᕐᒪᑦ ᐱᔪᓐᓇᑎᐊᖅᑐᒥᒃ ᓱᒃᑲᔪᒃᑯᑦ ᖃᕋᓴᐅᔭᓕᕆᔾᔪᑎᒥᒃ ᐊᒻᒪᓗ ᐱᐅᓪᓚᕆᑦᑐᒃᑯᑦ ᑐᑭᓯᒋᐊᕐᕈᓐᓇᐅᑎᓂᒃ ᐊᔪᕈᓐᓂᖁᓪᓗᒋᑦ ᐃᓄᐃᑦ, ᐱᓕᕆᕕᐅᔪᑦ ᐊᒻᒪᓗ ᒐᕙᒪᒃᑯᑦ ᐱᓕᕆᔪᓐᓇᖁᓪᓗᒋᑦ ᐊᒻᒪᓗ ᑐᓴᐅᒪᖃᑎᒌᑦᑎᐊᕐᓗᑎᒃ ᐊᒻᒪᓗ ᐊᓯᖏᑦ ᐅᓪᓗᒥᐅᔪᖅ ᓄᓇᕐᔪᐊᕐᒥ. ᒥᔅᑕ ᓯᓇᐃᑐᒫᓐ ᒫᓐᓇᐅᔪᖅ NNI ᑐᓴᐅᒪᖃᑦᑕᐅᑎᓂᕐᒧᑦ ᖃᐅᔨᓴᖅᑎᒻᒪᕆᐅᔪᖅ ᒐᕙᒪᒃᑯᑦ ᓄᓇᕗᑦᒥ ᐱᕙᓪᓕᐊᔪᓕᕆᔨᒃᑯᑦ ᐊᒻᒪᓗ ᐃᖏᕐᕋᖃᑦᑕᖅᑐᓕᕆᕕᐊᓂ, ᐊᑐᖃᑦᑕᖅᑐᖅ PHP ᐊᒻᒪᓗ HTML ᖃᐅᑕᒫᑦ ᐱᓕᕆᓂᖓᑎᒍᑦ. ᐊᒻᒪᓗᒃᑕᐅᖅ, ᑎᑎᕋᖅᑎᐅᑲᐃᓐᓇᕐᒥᔪᖅ ᑖᒃᑯᓇᓂ NNI ᑳᑦᑐᓛᒃᓯᓂᕐᒧᑦ ᐅᓐᓂᓗᒃᕕᐅᔪᓄᑦ ᑲᑎᒪᔩᑦ ᐊᒻᒪᓗ ᐋᖅᑭᒃᓱᐃᔨᐅᓪᓗᓂ ᖃᓄᐃᓕᐅᕈᑎᐅᓂᐊᖅᑐᑦ, ᐃᓕᓐᓂᐊᕐᓂᓕᕆᓂᕐᒧᑦ ᐱᓕᕆᐊᖅ ᓇᒻᒥᓂᖃᑦᑎᓄᑦ ᐊᒻᒪᓗ ᐊᖓᔪᖅᑳᖏᓐᓄᑦ ᓄᓇᕗᒻᒥ ᓇᒻᒥᓂᖃᑦᑎᐅᔪᓄᑦ. ᐃᓚᒋᔭᐅᒻᒥᔪᑦᑕᐅᖅ ᓄᓇᓕᐸᐅᔭᒃᑯᖏᓐᓄᑦ ᐃᖃᓗᐃᑦ ᐱᕙᓪᓕᐊᔪᓕᕆᓂᕐᒧᑦ ᑲᑎᒪᔨᕋᓛᑦ ᐊᒻᒪᓗ ᑲᑎᒪᔨᐅᖃᑕᐅᒻᒥᔪᖅ ᐊᑦᔨᒌᖏᑦᑐᓂ ᑲᑎᒪᔨᐅᔪᓂ.

ᓯᐅᕋ ᒦᑯ, (ᓴᓂᑭᓗᐊᖅ)
ᒥᔅ ᒦᑯ ᓴᓂᑭᓗᐊᕐᒥᐅᑕᐅᓯᒪᔪᖅ ᐃᓅᓯᓕᒫᒥᓂ, ᐊᒻᒪᓗ ᓇᒻᒥᓂᖃᑦᑎᐅᔪᖅ ᑖᒃᓱᒥᖓ SANNY ᖃᖓᑦᑕᖅᑎᑕᐅᓯᒪᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕈᑎᓂᒃ 1998-ᒥᓂᑦ ᐱᖃᑎᖃᑦᑐᓂ ᐹᑉ ᒪᑲᓚᐃᓐᒥᒃ, ᓄᓇᓕᓐᓂ ᓂᐅᕐᕈᑎᖃᖃᑦᑕᖅᑐᑦ ᐊᒻᒪᓗ ᓴᓇᔪᓕᕆᓂᒃᑯᑦ ᐃᑲᔪᖅᐸᑦᑐᑎᒃ ᑖᒃᑯᓱᒧᖓ ᕿᓂᖅ ᓱᒃᑲᔪᒃᑯᑦ ᖃᕋᓴᐅᔭᓕᕆᔾᔪᑎᒥᒃ, ᐊᑐᕐᓂᐊᖅᑐᖅ ᐱᒻᒪᕆᐅᔪᓂᒃ ᐱᓕᕆᖃᑦᑕᖅᓯᒪᓂᕐᒥᓂᒃ ᑖᒃᑯᓄᖓ NBDC-ᑯᓐᓄᑦ ᓄᓇᓕᓐᓂ ᖃᕋᓴᐅᔭᓕᕆᓂᕐᒧᑦ ᐱᔨᑦᑎᕋᖅᑎᐅᓗᓂ ᒥᑭᑦᑐᒥ ᓄᓇᓕᓐᓂ. ᐃᓚᖃᑦᑐᖅ ᓴᓇᓐᖑᐊᖅᑎᓂᒃ ᐊᒻᒪᓗ ᐱᖃᑎᖃᑦᑐᓂᒃ ᐹᑉᒥᑦ ᐱᒋᐊᓚᐅᖅᓯᒪᔫᒃ ᖃᕋᓴᐅᔭᒃᑯᑦ ᑕᑯᒋᐊᖅᕕᖓᑎᒍᑦ ᓂᐅᕕᕐᕕᒻᒥᑦ www.soapstoneartists.com ᐱᕕᖃᑦᑎᑦᑎᔪᒪᓪᓗᑎᒃ ᓴᓇᓐᖑᐊᖅᑎᓕᒫᓂᒃ ᓄᓇᓕᓐᓂ ᐊᓯᒃᑲᓐᓂᐊᓂᒃ ᓂᐅᕐᕈᑎᖃᕝᕕᐅᔪᓐᓇᖅᑐᒥᒃ ᓴᓇᔭᖏᓐᓄᑦ. ᐱᒋᐊᓚᐅᖅᓯᒪᔪᒃ SANNY ᖃᖓᑦᑕᖅᑎᑕᐅᓯᒪᔪᒃᑯᑦ ᖃᕋᓴᐅᔭᓕᕆᓂᕐᒥᒃ ᐊᑐᐃᓐᓇᐅᑎᑦᑎᓪᓗᑎᒃ ᖃᖓᑦᑕᖅᑎᑕᐅᓯᒪᔪᒃᑯᑦ ᖃᕋᓴᐅᔭᖃᑦᑎᑦᑎᓂᕐᒥᒃ ᑕᒪᒃᑯᓄᖓ ᐱᔪᒪᔪᓄᑦ ᐱᑦᔪᑎᖃᑦᑐᑎᒃ ᐊᑭᑐᓗᐊᕐᓂᐊᓗᒋᕙᑦᑕᖏᓐᓄᑦ ᐅᖄᓚᐅᑎᒃᑯᑦ ᐊᑭᓕᕆᐊᓖᑦ ᐅᖓᓯᒃᑐᒃᑯᑦ ᐅᖄᓚᔾᔪᑎᐅᖃᑦᑕᖅᑐᓄᑦ ᐃᖃᓗᓐᓄᑦ. ᒥᔅ ᒦᑯ ᐊᖓᔪᖅᑳᖑᓚᐅᕐᒥᔪᖅ ᓂᐅᕕᖅᕕᒻᒥ ᑕᐃᑲᓂ ᓄᐊᑑᓐ ᓂᐅᕕᖅᕕᖓᓂ ᐊᒥᓱᓄᑦ ᐊᕐᕌᒍᓄᑦ ᐊᒻᒪᓗ ᖃᐅᔨᒪᔭᐃᓐᓇᕆᓪᓗᓂᒋᑦ ᓴᓂᑭᓗᐊᕐᒥᐅᑦ, ᑕᐃᒪᐃᒻᒪᑦ ᖃᐅᔨᒪᔭᐃᓐᓇᕆᕙᐃᑦ ᐱᔨᑦᑎᖅᑕᓂ ᖃᕋᓴᐅᔭᒃᑯᑦ. ᐊᒥᓱᑦ ᐊᕐᕌᒍᑦ ᐊᓂᒍᓕᖅᑎᓪᓗᒋᑦ ᐃᓱᒪᓚᐅᖅᑐᖅ ᓈᒻᒪᔅᓯᒋᐊᖓᓂᒃ ᐃᓚᓕᐅᑎᒋᐊᔅᓴᖅ ᑖᒃᑯᓄᖓ NBDC ᑲᑎᒪᔨᖏᓐᓄᑦ. ᐃᓱᒪᓘᑎᓪᓗᐊᑕᖏᑦ ᖃᖓᑦᑕᖅᑎᑕᐅᓯᒪᔪᒃᑯᑦ ᖃᕋᓴᐅᔭᓕᕆᓂᕐᒧᑦ ᓱᒃᑲᓐᓂᖓ ᐊᒻᒪᓗ ᐊᑐᕋᔅᓴᐅᖏᓐᓇᕆᐊᖃᕐᓂᖓ. ᑕᑯᔪᒪᓪᓗᓂᑦᑕᐅᖅ ᐊᖏᓪᓕᒋᐊᖅᑕᐅᓗᓂ, ᐊᑭᖓ ᐊᑭᑦᑐᕆᐊᖅᑕᐅᔭᕆᐊᖃᕋᓗᐊᖅᐸᑦ.

ᐅᓂᒃᑳᑦ ᐱᓕᕆᓂᕆᖃᑦᑕᖅᓯᒪᔭᖏᓐᓄᑦ ᒪᓕᓐᓂᐊᖅᐳᑦ ᐊᑐᐃᓐᓇᐅᓕᖅᐸᑕ ᐅᑯᓇᓐᖓᑦ:  
ᕗᕌᓐᑯ ᐸᓯᒥ, ᓄᓇᕗᑦ ᑐᓐᖓᕕᒃᑯᓐᓂᑦ ᑲᑎᒪᔨ (ᐃᖃᓗᐃᑦ)
ᕋᐃᐊᓐ ᐋᓕᕗ, EDT ᑎᒃᑯᐊᖅᑕᐅᓯᒪᔪᖅ ᑲᑎᒪᔨ (ᐸᖕᓂᖅᑑᖅ)